Garzon epaileak "Batasuneko zuzendaritza berria osatzea" leporatzen die atzo atxilotutako ezker abertzaleko kideei, albiste agentzien arabera. 2007ko udazkenean Seguran atzemandako lagunei ere gauza bera egotzi zien. Alfredo Perez Rubalcaba Espainiako Gobernuko Barne ministroak, berriz, gaur eman ditu argibideak: horrelakoak "behin eta berriro" gertatuko direla adierazi du Rubalcabak, "ezker abertzaleak politika eta indarkeria artean aukeratu ezean", Europa Pressek zabaldu duenez. Bitartean, Amnistiaren Aldeko Mugimenduak atzoko polizia operazioaren atzean "operazio politiko argi bat" dagoela adierazi du. Bestalde, poliziek gogor oldartu zitzaizkien Amaia Esnalen etxera hurbildu ziren lagun eta senideei. Miaketa egiten ari zirela, kolpeka hasi zitzaizkien Esnalengana gerturatzen saiatu zirenei eta, gutxienez, bi lagun zauritu zituzten, AAMren arabera.
Azken operazioaren aurrean Amnistiaren Aldeko Mugimenduaren oharra:
Atzo espainiar poliziak burutu zuen operazio poliziaren aurrean Euskal Herriko Amnistiaren Aldeko Mugimenduak honako gogoeta egiten du:
Ezer baino lehen besarkadarik sentikorrena eskaini nahi diegu une hauetan poliziaren eskuetan aurkitzen diren militante independentista guztiei.
Operazio polizial handi honen atzean operazio politiko argi bat dago. Euskal Herria benetako prozesu demokratiko bati lotzeko ahalegina izan da atzoko sarekadarekin zigortu dutena. Herri honetara konponbide demokratiko bat ekartzeko lanari eskuburdinekin erantzun dio espainiar estatuan.
Euskal Herrian demokrazia ekiditeko daude poliziak, salbuespeneko epaitegiak eta hauen lana zuritzen duten ahots bakarreko komunikabide handiak. Horregatik, demokraziara bidean edozein urrats egin nahi duen orok polizia izango du aurrean.
Polizialki eta errepresiboki ausarta den gobernua ahula da politikoki. Estatu espainiarraren ahultasun politikoaren neurria erakusten digu atzoko operatiboak.
Une hauetan, hitzak alde batera utzi eta herri honetako sektore batek pairatzen duen errepresio mugagabearen aurrean jarrera argia eta konpromiso zehatzak eskatu beharrean gaude Euskal Herriko alderdi politiko, eragile eta sindikatuei.
Amnistiaren Aldeko Mugimendutik gaur arratsaldean herri guztietan mobilizazioak burutzeko deia egiten dugu.
Atzoko atxiloketen aurrean mobilizazioak izango dira gaur arratsaldean herri guztietan
Amnistiaren Aldeko Mugimenduak adierazi du atzoko polizia operazioaren atzean "operazio politiko argi bat" dagoela. Gaur arratsaldean burutuko diren mobilizazioetan parte hartzeko deia luzatu du. Bitartean, gaur goizean Madrilera eraman dituzte atxilotutako hamar euskal herritarrak. Inkomunikatuta dauzkate, epailearen aurrera noiz eramango. Arnaldo Otegi, Rufi Etxeberria, Rafa Diez Usabiaga, Sonia Jacinto eta Arkaitz Rodriguez ezker abertzaleko kideak LABen Donostiako egoitzan atxilotu zituzten. Hala ere, horrek ez du esan nahi, Alfredo Perez Rubalcaba Espainiako Gobernuko Barne ministroaren arabera, "oraingoz" Fiskaltzak eta Espainiako Justiziak LABen kontra egingo dutenik. "Dakigun bakarra da Batasuneko Mahai Nazional berriak LABen egoitzan egiten zituela bilerak. Baina ez nuke beste ondoriorik aterako. Ez gaude horretan, oraingoz", esan du gaur Rubalcabak operazioari buruzko balorazioa egitean. Espainiako Poliziak Amaia Esnal, Txelui Moreno, Miren Zabaleta, Mañel Serra eta Ainara Oiz ere atzeman zituen. Baltasar Garzon Espainiako Auzitegi Nazionaleko epaileak agindu zuen operazioa. Haren esanetan, "Batasuneko Mahai Nazional berriaren aurkakoa" izan da. Baliteke Garzonek etzi hartzea hamarrak. Argazkian, "salbuespen egoeraren" aurkako manifestazioa Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun