Urtero bezala, Nafarroa Oinezera joateko autobusa antolatu dute Berbots Erandion Euskaraz! elkarteak eta Altzaga ikastolak. Nafarroako ikastolen aldeko aurtengo jaia igande honetan, urriak 18, ospatuko da Arbizu, Lakuntza eta Arruazun, "Txikiak handi" lematzat hartuz. Etxarri Aranazko Andra Mari ikastolak antolatu du Nafarroa Oinez 2009. Gauzak horrela, gaur da azken eguna Erandioko autobusean izena eman nahi dutenentzat. Prezioa 10 eurokoa izango da (4 urte baino gutxiagoko umeek ez dute ordaintzen) eta Astrabuduako Primera Linea edo Altzagako La Plaza tabernan eman beharko da izena. Bestalde, ostiral honetan, hilak 16, herrian euskararen erabilera sustatzeko kanpainarako argazkia egingo du Berbotsek. Horretarako, 22:00etan jarri dute hitzordua, Altzagako azoka zaharrean. Aurretik, All Jazz Era talde gorliztarrak emango du kontzertua, 20:30ean. Argazkian, pasa den irailaren 27an Andra Mari ikastolako umeek eta gurasoek Nafarroa Oinez ibilbidea egin zuten zirkuitua gozatu eta hobetzeko asmoz / © Nafarroa Oinez.
Nafarroa Oinezerako autobusa goizeko 8:45ean abiatuko da Astrabuduako taxi geltokitik, ordu laurden geroago, Altzagako Santi Brouard parkean itxaroten daudenak hartzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun