Larrabasterrako auzokidea den Armando Ribeiro Athleticeko atezainak Lehoi Bihotz saria jaso zuen atzo arratsaldean Zallan, Fernando Llorenterekin batera. Saria bertako Peña Zallak ematen du, Athleticeko baloreak hoberen ordezkatzen dituzten lehen taldeko jokalariak nabarmentzeko asmoz. Aurtengoa sariaren seigarren edizioa izan da. Ez da ohikoa saria bi jokalariri aldi berean ematea, baina Zallako jarraitzaileek saria emateko urtero egiten duten bozketan, Llorente eta Ribeiro berdinduta irten ziren eta hori dela eta biei Lehoi Bihotz saria ematea deliberatu zuten. Larrabasterrako atezainak erakutsi duen profesionaltasuna eta zelaian zein zelaitik kanpo, Athleticekin eta jendarte mailan agertu duen konpromisoa baloratu zituzten Zallakoek Armandori saria ematerakoan. Aurreko irabazleak Julen Guerrero, Carlos Gurpegi, Joseba Etxeberria, Ismael Urzaiz eta Fernando Amorebieta izan ziren. Argazkian, Armando Ribeiro partidaren batean / © Athletic Club.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun