Leioa eta Erandioko campuseko ikasleen oharra:
Atzoko atxiloketak salatzeko eta Euskal Herriak benetan behar duen aldaketa politikoaren alde eragiteko kontzentrazioa burutu da gaur eguerdiko 12:00etan Leioako Campusean.
75 pertsona inguru elkartu dira Mikel Laboa plazan burututako kontzentrazioan. Bertan elkartutakoek operazio polizial honen izaera politikoa agerikoa dela salatu nahi izan dute eta atxilotuei beren elkartasuna adierazi. Atzoko sarekadarekin, Espainiar estatuak Euskal Herriarentzat ezinbestekoa den aldaketaren alde lanean ari direnen aurka egin duela esan dute.
Arnaldo Otegi, Rafa Diez eta ezker abertzaleko beste zortzi militanteren atxiloketak salatzeko hainbat protesta izan ziren atzo Uribe Kostan eta Erandion. Handiena, Algortan burutu zen, Ertzaintzak bertan bildutako 200 auzokideak bideokameraz grabatu zituela. Itzubaltzeta / Romon ere tentsioa nagusitu zen. Bertako auzokideek jakinarazi dutenez, Ertzaintzak istiluen aurkako materiala erabiltzearekin mehatxatu zituen manifestazioan atera ziren 50 bat lagunak, nahiz eta azkenean haien kontra oldartu ez. Aldiz, Leioan erabateko lasaitasunean elkarretaratzea egin zuten 60 bat pertsonek. Goizean, Gaztesareak zabaldu duenez, 75 ikaslek kontzentrazioa burutu zuten Leioa eta Erandioko campuseko Mikel Laboa plazan. Azkenik, "Gara"k gaur zabaldu duenez, 60 auzokide bildu ziren Erandion atxiloketen aurrean bere protesta azaltzeko. Baina, horiez gain, bihar, ostirala, ere hainbat mobilizazio izango dira: LABek deituta, 9:30ean auto karabana izango da Erandioko kiroldegiko atzeko parkingetik Ipar Uribe osotik, ondoren, 12:30ean, elkarretaratzea egingo dute Telletxe plazan. Plentzian, berriz, 20:00etan Piruli plazatxoan jarri dute hitzordua. Argazkian, campuseko elkarretaratzea / Gaztesarea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun