Madriletik heltzen ari diren informazioak nahasiak dira. Rufi Etxeberria eta Ainara Oiz ezker abertzaleko kideak ia 16:00ak zirela libre geratu dira Espainiako Auzitegi Nazionalean, Baltasar Garzon epaileak hala erabakita. Horretan bat datoz behintzat hainbat iturrik. Amnistiaren Aldeko Mugimenduaren arabera, Amaia Esnal eta Mañel Serra ere libre geratuko lirateke: "bost eguneko epea eman die epaileak bermea ordaindu dezaten", errepresioaren kontrako mugimenduak aipatu duenez. Europa Press albiste agentziak zabaldutakoaren arabera, azken horren aurkako akusazioak atzera botatzea eskatu behar zuen Fiskaltzak; baita Etxeberria eta Oiz fidantzapean askatzea ere. Arnaldo Otegi, Rafa Diez, Sonia Jacinto, Arkaitz Rodriguez, Miren Zabaleta, Amaia Esnal eta Txelui Moreno espetxeratzea eskatu omen du akusazioak, aipatu agentziak dioenez. Sei, zazpi eta zortzi izan, 19:00etan emango du gainontzeko atxilotuen egoeraren berri Garzonek. Argazkian, herritar bat kartelari eusten gaur Algortan egindako elkarretaratzean.
Bitartean, ezker abertzalea, Aralar , EA eta EAJz gain, Ezker Batutik banandutako Alternatiba alderdia ere izango da bihar Donostian egingo den nazio manifestazioan. EBk, berriz, "askatasun osoa" eman die militanteei martxan parte hartzeko. Horretaz gain, EGI, Gazte Independentistak, Gazte Abertzaleak, Bilgune Feminista, ESAIT, Nazio Eztabaida Gunea, Askapena, Zutik, Lokarri, Anitzak eta abar luze bat agertu dira mobilizazioaren alde. Bestalde, mundu osoko sindikatuen babesa jaso du LABek: Munduko Sindikatuen Federazioa; Coordinadora Obrera Sindical (Herrialde Katalanak); Sindicato de Comisiones de Base; CIGA eta CUT (Galizia); SAT (Andaluzia); ATE eta CTA (Argentina); UNETE (Venezuela); CUT (Txile); FTE (Mexiko); CTB (Brasil); Cemental (Peru); STC (Korsika); COVAS (Italia); SUD (Frantzia); UNIA sindikatuko gazteak (Suitza); eta SLB (Bretainia). Horretaz gain, hainbat herrialdetako eragileen elkartasuna jaso dute atxilotutako ezker abertzaleko kideek, Askapenak zabaldu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun