Joseba Elorriaga "Peski" (argazkian) Algortako euskal preso politikoa bihar, larunbata, kaleratuko da Navalcarneroko (Madril, Espainia) espetxetik, etxekoek epaileak ezarritako 10.000 euroko fidantza ordaindu ondoren. Horrela jakinarazi diote UKBERRI.NETi bere lagunek. Hala ere, ez dute zehazterik izan kartzelatik zein ordutan irten eta noiz helduko den herrira. Seguru asko, Amnistia tabernan egingo diote lehenengo harrera, lagunekin Leioako gasolindegian batu ostean. Elorriaga 2007ko urriaren 16an egindako operazioan atxilotu zuen Espainiako Poliziak, eta Baltasar Garzon Auzitegi Nazionaleko epaileak espetxeratzea agindu zuen AAMk "eskandalagarritzat" jotako auto batean oinarrituta. Orduan atxilotutako gazteetatik Lander Labajo algortarra baino ez dago espetxean. Izan ere, Aner Mimenza getxoztarra asteazkenean irten zen kalera, oraingoan ere 10.000 euroko fidantza ordaindu ostean. Bitartean, 2009ko irailean eman zuen Garzonek Joseba eta Algorta, Getxo eta Berangoko beste hamar gazte prozesatzeko autoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun