Getxophoto Nazioarteko Argazkilarien Jaialdiaren hirugarren edizioa "arrakastaz" bukatu da, eta antolatzaileen iritziz, 60.000 pertsona inguru hurbildu dira irailaren 10etik urriaren 11ra egin diren erakusketa eta jardueretara. Begihandi kolektiboak antolatua, jaialdiak Getxo udalerria erakusleiho gisa hartzea du helburu, eta herritarrek ekimenetan parte hartzea ahalegintzen da. Hala, Portu Zaharreko auzokideak, Algortako azokako merkatariak edo udalerriko taberna, saltoki, txoko, elkarte gastronomiko eta Aixerrota arte erakusketa gelako arduradunak ekintzak garatzeko laguntza eskaini dute, Begihandiko kideen hitzetan. Antolatzaileen aburuz, hirugarren edizio honetan "Getxophotok publiko mailan eta baliabide profesionalean finkatu da". "Publikoak proposamena ulertzen du jada, eta horren adibide izan dira iraun duen hilabete guztian maparekin eskuan argazkilaritzaz gozatu ahal izan duten pertsonak", gaineratu dutenez. Horrela, erakusketa gehienak espazio publikoetan direla kontuan hartuta begiraleen zenbatekoaren datu zehatzak ematea ezinezkoa den arren, antolatzaileen iritziz 60.000 pertsona inguru hurbildu dira erakusketara eta antolaturiko jardueretara. Argazkian, Algortako San Nikolas plazan jarritako irudiak.
Jaialdiaren hirugarren edizioak argazkilari, editore eta kritikoen artean interes handia sortu du. Beste adibide bat da, jaialdiak bere kontzeptua eta programazioa aukezteko jaso dituen gonbidapenak. Berriki, Bilboko Guggenheim Museoan eta Madrileko Casa Asian aurkeztu zen jaialdia, eta azaroaren erdialdean, jaialdia zein edizio honen argitalpena argazkigintzan espezializatutako enpresa eta PhotoEspaña ekimeneko antolatzailea den La Fabrica-n aurkeztuko da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun