Uribe Kostako AAMren oharra:
Jagoba Terrones Basauriko espetxean dago
Gaur Berangon manifestazioa egin dute 250 lagun inguruk Jagoba Terronesen atxiloketa salatzeko. Manifestazioaren aurretik azaldu denez, ostiralean Jagoba atxilotu zutenean etxetik Indautxuko komisariara eraman zuten. Bertan 13:00ak arte eduki ondoren Basauriko espetxera eraman zuten. Atxiloketan, poliziak tratu normala eman bazion ere, ertzaintzak kalean zeudenekin egindakoak salatu dituzte, bai eta Indautxuko komisarian polizia bat Jagoba iraintzen eta probokatzen ibili izana. Jagobaren etxekoek bisita egin diote atzo eta gaur Basauriko espetxean. Bertan Jon Beaskoa eta Julen Larrinagarekin dago.
Jagoba Terrones berangoztarra ostiralean Indautxuko komisarian iraindu, xaxatu eta estutu egin zutela salatu du gaur Amnistiaren Aldeko Mugimenduak. "Jagoba askatu! Euskal Herriak askatasuna behar du!" lelopeko manifestazioa Berangoko kaleak zeharkatu baino lehen egindako adierazpenetan (mp3) eta arratsaldean Etengaben zabaldutako oharrean eman du horren berri AAMk. Errepresioaren aurkako mugimenduaren arabera, Espainiako Polizia Nazionalaren jarrera zuzena izan zen atxiloketaren unean, tartean Jagoba Terrones semea agurtzea bermatu zutela. Aldiz, Ertzaintzak Terronesi elkartasuna adierazteko bere etxe inguruan bildutakoei agertutako "jarrera harroputza" nabarmendu dute. Era berean, atxiloketaren ostean Indautxuko komisariara eraman eta bertan polizia batek psikologikoki estutzen ibili izana salatu du AAMk. Egun, Jagoba Basauriko espetxean dago, eta larunbatean senideen bisita izan zuen. Bestalde, gaurko manifestazioan izandako jazoera bakarra auto gidari batek sortu du, birritan martxako hainbat lagun harrapatzen saiatu denean. Argazkian, gaur egindako martxan 250 bat lagun izan dira, AAMren arabera. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun