Bizkaiko Foru Aldundiko Nekazaritza Sailak Getxoko Gorrondatxe hondartza (Azkorri izenaz ezagunagoa) inguruak babes ditzan eskatuko dio Eusko Jaurlaritzari, apo lasterkariak lurralde bizkaitarrean duen habitat bakarra zaintzeko asmoz. "Bufo calamita" (apo lasterkaria) espeziea Txingudiko badian (Gipuzkoa) bizi da eta arriskuan dauden Espezieen Euskadiko Zerrendan “kaltebera” kategorian katalogatu zen. Bizkaian, aldiz, ez du inolako babes-mailarik, katalogoa egin zen garaian ez zen espezie horretako alerik antzeman eta, foru iturriek zehaztu dutenez. Nolanahi ere, Gorrondatxeko duna-sisteman gune isolatu txiki bat aurkitu zenez, espezie hori berreskuratzeko lanak abiarazi zituen Nekazaritza Sailak 2005eko irailean. Ordutik hona Aranzadi Zientzia Elkartearekin batera egindako lanak arrakastatsuak izan dira: hondartzan bertan ugalketarako gune berri bi eratu dira. Azterketa egin zen garai berean, ugalketarako beste gune berri bi eratu ziren Getxoko Udalaren lankidetza zuzenarekin, Gorrondatxen antzemandako populazioak zuen egoera kritikoari aurre egitearren. Argazkian, Getxoko udal arduradunak apo lasterkaria babesteko neurriak aurkezten, 2008ko martxoan.
Apoaren jarraipena egin den bitartean, haren populazioari dagokionez, kuantifikatu diren parametroek erakutsi dute apoa berreskuratzeko martxan jarri ziren neurriek erantzun positiboa izan dutela, apoaren bilakaera handitu egin baita, Bizkaiko Foru Aldundiko arduradunek diotenez. "Populazioaren tamaina oraindik txikia bada ere, biderkatuz joan da urtetik urtera -2006an 6 indibiduo zeuden; 2007an, 7; eta, 2008an, 29-. 2006an errunaldi bakarra izan zen; 2007an, aldiz, 5", zehaztu dutenez. 2009ko xedea da apo lasterkariaren populazioa monitorizatzen jarraitzea eta espeziearen jarraipenerako egiten diren laginketak Azkorriko hareatzaren inguruetara zabaltzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun