Asuako lindano zabortegi "ilegal eta klandestinoaren" auzian deklaratuko du bihar Esther Larrañaga sailburu ohiak
Esther Larrañaga Eusko Jaurlaritzako Ingurumen sailburu ohiak eta Iñaki Ezkurra erakunde bereko sailburuorde izandakoak, biak Eusko Alkartasuneko kideak, asteazken honetan (urriak 21) deklaratu beharko dute auziperatu gisa, Erandioko Asua auzoan egindako lindano zabortegi "ilegal eta klandestinoaren" auzian, "Deia" egunkariak atzoko edizio digitalean (espainolez) jakinarazi zuenez. Hurrenez hurren, 9:30ean eta 10:00etan hartuko diete deklarazioa Bilboko 7. instrukzio epaitegian, "aurretik euren eskubideak irakurrita", Lur Maitea erakunde ekologistak zehaztu duenez. Lur Maiteak aspaldi aurkeztu zuen salaketa: 1394/03 zenbakiko auzian, Euskalduna zabortegian lindano bota izanaz gain, hondakin arriskutsuak Argalariora (Barakaldo) eraman ondoren zabortegiko eremua behar bezala garbitu gabe Prycari saldu eta merkataritza gune handia (egun, Carrefourrena dena) eraikitzen utzi izana ere leporatu zien Eusko Jaurlaritzari, Erandioko Udalari, Ihobe SA ingurumen kudeaketarako enpresa publikoari eta Edificaciones Industriales Asua SA (Edinasa) enpresari. Bizkaiko Ingurumen Fiskaltzak ere bat egin zuen Larrañaga eta Ezkurrari inputatu gisa deklarazioa hartzeko eskaerarekin. Horiei baino lehen, beste zazpi auziperatuei hartu zieten deklarazioa; orain gutxira arte Erandioko alkate izandako Mikel Arieta-Araunabeña tartean zela. Argazkian, Larrañaga / © Eusko Alkartasuna.
Sumarioa 2003an hasi bazen ere, lehenengo aferak 1995ekoak dira. Orduan, Edinasa enpresak Erandioko lur batzuk erosi zituen eta lehenengo lanak egin zituztenean, bertan 2.500 bat tona lindano topa zuten. Lindano hori Euskalduna zabortegira eraman zuten, 2002ra arte. Lur Maiteak salatu zuenez, lindanoa Europako Batasuneko funtsak jasotzen dituen Argalarioko zabortegira eraman ondoren, Euskalduna zabortegia ez zuten garbitu. Halere, lur horiek kutsatuta ez zeudela egiaztatzen zuen txostena sinatu zuen urte horretan Iñaki Ezkurra Ingurumen sailburuordeak. Horrela, Pryca nazioarteko enpresari lurrak saldu eta bertan merkataritza gune handia eraiki ahal izan zen. Ekologistek egindako salaketak, baina, 2006an baieztatu zuen Espainiako Toxikologia Institutuan. Dagoeneko Carrefour supermerkatua dagoen lurretan artsenikoa, kadmioa, nikela, beruna eta kromoa topatu zuten egindako azterketan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun