Euskal bodyboard zirkuituari dagokionez, olatuak metro erdi eskasekoak izan baziren ere, baldintza onak zirelakoan, larunbatean ekin zioten hirugarren probari, Zumaiako Itzurun hondartzan. Hori bai, aurreikusita baino ordu bi beranduago, olatu hobeagoen zain. Txikiekin hasi zen lehia: sub 16, sub 18, neskak, open B eta dropknee mailak jokatu ziren larunbatean eta iganderako utzi ziren Open A maila goreneko kanporaketak. Azken jardunaldi horretan ere eguzkiaz gozatu zuten, haize leunaz eta olatu handiagoak ere izan zituzten. Hantonek lortu zuen puntuaziorik handiena eta Aritz Larrinaga izan zen bigarren. Sopeloztarrak dira, beraz, oraingoan ere nagusi zirkuituan.
Beste kategoriatan, aipagarria da open B mailan ere txapelduna erabakita gelditu zela, zirkuitua Luis Perezek irabazi duelarik, Zumaian Ion Lopez izan zen onena. Beste horrenbeste dropknee-an, Alex Castañedak irabazi zuen Zumaian eta zirkuitua erabakita utzi. Eider Paredes nagusitu zen emakumezkoetan, eta zirkuitua eskuratu zuen. 16 urtez azpikoan Diego Costas izan zen onena eta zirkuitua Xabier Urrestillak eraman du, eta 18 urtez azpikoan Unai Urangak irabazi zuen Zumaian eta Unai Insaustik zirkuitua.
Euskal Bodyboard zirkuituko txapela jantziko du Aritz Larrinagak
2009ko urr. 20a, 20:34
El Diario Vasco Euskal Bodyboard zirkuituko laugarren eta azken proba jokatzeke dagoela, Aritz Larrinaga sopeloztarrak matematikoki lortu du txapelketa irabaztea. Euskal bodyboard zirkuituak hirugarren hitzordua bizi izan zuen asteburuan zehar Zumaiako Itzurun hondartzan. Maila nagusian, open A, Sopelakoa ere den Antonio Ortiz "Hanton" izan zen irabazlea. Bigarren sailkatu zen Larrinaga. Azken horrek emaitza bikainak lortu ditu jokatu diren hiru probetan: Donostian garaipena eskuratu zuen, eta Sopelan zein Zumaian bigarren sailkatu zen. Ondorioz, azken proba falta dela txapelduna da sopeloztarra. Hori Lemoizko zentral nuklearreko olatuan jokatuko da. Baldintza bereziak behar dituenez, Euskal Herriko Surf Federazioak (EHSF) hilabeteko itxarote epea jarri du, abenduan zehar egingo delarik lehiaketa ikusgarri hau. Bestalde, Barinatxe (Salvaje) hondartza getxoztar-sopeloztarrean egingo dute larunbat honetan, urriak 24, Getxoko Surf Txapelketa. Osteguna izango da izena emateko azken eguna, Getxo Surf Taldeak (espainolez) zehaztu duenez. Argazkian, Donostiako proban garaipena eskuratu zuen Aritz Larrinagak / © EHSFIrakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun