Leioa eta Erandioko campuseko ikasle mugimenduaren oharra:
Atxiloketak, epaiketak, multak, mota guztietako eskubide urraketak... Euskal Herriak jasaten duen salbuespen egoerak zuzeneko eragina du jende askorentzat. Ostegun honetan, Leioako Campusean, kolpe horiek jasan behar dituzten guztiei elkartasuna adierazteko eguna antolatu dugu. Euskal Herrian orokorrean ematen den egoera jasangaitz hau salatuz, eta bereziki Campuseko hainbat kideri babesa emanez.
Elkartasunari mugarik jartzea onartzen ez dugunez, egun osoko egitarau bat osatu dugu.Goizeko 11:30ean unibertsitatean bertan burutuko den manifestazio batekin hasiera eman, eta gauean 7katu gaztetxean ospatuko den jaialdiarekin amaiera emanez.
Animatu eta zatoz!
Egitaraua
11:30ean, manifestazioa eta ekitaldia Mikel Laboa plazatik.
14:30ean, bertso bazkaria Errondabiden.
18:00etan, kantu-triki-poteoa Zazpi Kaleetan barrena.
20:00etan, jaialdia 7katu gaztetxean: ekitaldia, musika eta sorpresa gehiago!
Ostegun honetarako, urriak 22, euskal errepresaliatu politikoen aldeko eguna antolatu du Leioa eta Erandioko campuseko ikasle mugimenduak. Goizeko 11:30ean hasiera emango diete ekitaldiei, unibertsitatean bertan egingo duten manifestazioarekin. Mikel Laboa plazatik abiatuko da martxa. Ondoren, Bilbo aldera joko dute. 14:30ean bertso bazkaria izango da Zazpi Kaleetako Errondabide herriko tabernan. 18:00etan, berriz, kantu-triki-poteoan abiatuko dira, 7katu gaztetxera heldu arte. Bertan jarraituko du festak, ekitaldia, musika eta sorpresa gehiago izango direla, 20:00etatik aurrera. Leioa eta Erandioko campuseko ikasle mugimenduak adierazi duenez, "atxiloketak, epaiketak, multak, mota guztietako eskubide urraketak... Euskal Herriak jasaten duen salbuespen egoerak zuzeneko eragina du jende askorentzat". Horrexegatik antolatu dute Elkartasun Eguna: "kolpe horiek jasan behar dituzten guztiei elkartasuna adierazteko", alegia. Argazkian, "salbuespen egoeraren" kontrako elkarretaratzea Leioako campusean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun