Hilero, urritik maiatzera, Cinema Paradiso zikloaren filmak eskainiko dira lehenengo hamabostaldian, ohi denez jatorrizko azpitituludun bertsioan. Bigarren hamabostaldian, berriz, Zine-Kluba zikloak hartuko du lekukoa. Ziklo horien proiekzioak ostiralero izango dira, 22:00etan. Igandeko Haur Zinemari dagokionez, gaztetxoek igandero gozatu ahal izango dute beren film gustukoenak, bi saiotan: 12:00etan eta 17:00etan. Aurten Getxoko zinema zikloek "eskaintza anitza" izango dute, kultur iturrien arabera. "Horrela, zirkuitu komertzialeko kalitate eta balio artistiko gehieneko filmak eskainiko dira; ekoizpen independenteak eta ohiko zirkuituetatik kanpo dauden film luzeak, berriz, Cinema Paradison eskainiko dira", azaldu dutenez. Azkenik, haur eta gazteentzako filmak Igandeko Haur Zinema zikloan proiektatuko dira, haurrek zinema onenaz asteburuan goza dezaten.
Talentu berriak
Cinema Paradiso eta Zine-Kluba zikloetan ez dira proiekzioak eskainiko soilik. Ohi bezala, zinemari buruzko foruma egongo da filma amaitu ondoren eta, horretan, nahi duten ikusle guztiek parte ahal izango dute. Halaber, azken urteotan egin den legez, Getxoko zinema programazioak talentu berriak bultzatuko dituzte. Hori dela eta, hileroko lehenengo saioan zuzendari gazteen film laburrak eskainiko dira, horien lanak zabaltzeko asmoz.
Ostiralean hasita, zinemazale getxoztarrek berriro ere gozatu ahal izango dute Zine Kluba, Cinema Paradiso eta Igandeko Haur Zinema zikloez. Filmak urtebete egon dira Getxoko Kultur Etxearen egitarautik kanpo, Algortako Getxo Antzoki berria eraikitzeko lanak direla eta. Aurten proiekzioak bueltan dira, oraingo honetan Areetako Andres Isasi Musika Eskolan. Gauzak horrela, "Gran Torino" filmaren eskutik hasiko da etzi 2009-2010 zinema denboraldia. Orain arte Clint Eastwoodek zuzendu duen lan bakarra dugu hori. Bi ostiral barru, urriaren 30ean, "Bienvenidos al Norte" pelikularen txanda izango da, egun arte Frantziako komediarik arrakastatsuena. Azkenik, gaztetxoek Disney-Pixar ekoizpen etxearen "Up" animazio film dibertigarriaz gozatu ahal izango dute igande honetan, urriaren 25an. Argazkian, proiekzio makina zaharra Getxo Antzokia bota aurreko ekitaldian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun