Algortako Gazte Asanbladak 10 urte daramatza lapikoak "indabaz, imajinazioz eta errebindikazioz" betetzen eta herria elikatzen. "Urtero hasiz joan den egun honek beti izan du herria protagonista. Gazteok herri giroa suspertzeko egindako eguna, gure gustu eta nahietatik sortua. Beti herritik herriarentzat filosofia jarraituta", AGAk adierazi duenez.
Hona hemen egitaraua:
11:00 Diana, Agurra dantza taldeko txistularien eskutik.
12:00 Txotx eta aizkolari gazteen erakustaldia.
13:30 Ekitaldia.
15:00 Bazkaria, kantuak, enkantea...
17:00 "Hudaltzainak" ikuskizuna.
20:00 Poteoa Errerre txarangaren eskutik.
... eta azkenik gaupasa Txorimalo gaztetxean!
Urriaren 31n, larunbata, ospatuko da Algortako Txiki eta Otaegi plazan X. Indabada Mundiala. Eta dagoeneko Algortako Gazte Asanbladak (AGA) prest dauka egun horretarako egitaraua: babajana eguna 11:00etan abiatuko dute, diana, sagardo txotxa eta ekitaldiarekin, gero bazkari herrikoiarekin jarraitzeko. Tartean, aizkolari gazteen erakustaldia ere egongo da, 12:00etan, berrikuntza gisa. Sabelak bete ondoren, zozketak, kantak eta enkantea izango dira, bazkalostea animatzeko; baita Arkaitz Estiballes, Fredi Paya eta Etxahun Lekue bertsolarien "Hudaltzainak" ikuskizuna ere. Plaza ganoraz bildu eta atondu ostean, txikiteoaren ordua helduko da, Errerre Txaranga Band taldeak alaituta, baita herriz aldatzeko tenorea ere, jaialdiak Getxoko Txorimalo gaztetxean jarraituko baitu, urteroko gaupasa dela medio. Txartelak 7 eurotan (bazkaria+zapia) daude salgai Amnistia, UK eta La plaza tabernetan eta Eztabaida gunean. "Asko eskertuko genuke aurretik erosiko balira, zenbat jende datorren kalkulatzeko", adierazi du Algortako Gazte Asanbladak. Argazkian, orain bi urte inoiz baino lagun gehiago batu ziren Indabadan, 600 bat pertsona, ekitaldia Algorta, Getxo eta Berangoko hainbat gazteren atxiloketak salatzeko ekimen bihurtu zela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun