EAEko Auzitegi Nagusiak atzera bota du epaitegietako langileak euskalduntzea helburu zuen dekretua, "El Diario Vasco" egunkariak (espainolez) jakinarazi duenez. 2008an onartu zuen dekretu hori Juan Jose Ibarretxeren Gobernuak, baina Justizia Ministerioak haren kontra egin zuen. EAEko auzitegiak ez ditu Justizia Ministerioaren eskaera guztiak onartu, baina araudiaren funtsezko artikulu batzuk baliogabetu egin ditu. Erabaki du, adibidez, hizkuntz eskakizuna ez dela lanpostu guztietan ezarri behar, eta ohar eta jakinarazpenak euskaraz argitaratzea ez dela derrigorrezkoa. Eusko Jaurlaritzak helegitea jarriko du Justizia Ministerioaren erabakiaren kontra. Jose Manuel Finez Justizia sailburuordeak adierazi du uneotan ez daudela hizkuntz eskakizuna lanpostu guztietan ezartzearen alde, baina aurrerago "filosofia hori gauza daitekeela". Gainera, Jaurlaritzak dio jakinarazpenak euskaraz ere idatzi behar direla, eta euren eskariak euskaraz tramitatu nahi dituzten herritarrek horretarako aukera izan behar dutela. Epaiaren berri izan eta gero, Idoia Mendia Eusko Jaurlaritzako Justizia sailburuak iragarri du bere Exekutiboak dekretu berria egingo duela, "Justizia Administrazioa euskalduntzeko" helburuz, Eitb.com-ek zabaldu duenez. Argazkian, EAEko Auzitegi Nagusiaren egoitza, Bilbon / cc Abertzale.eu.
ETBn egindako elkarrizketa batean, Mendiak azaldu du bere Saila helegitea aurkeztea aztertzen ari dela, eta aurreko Gobernuaren dekretuarekin "espirituarekin eta helburuarekin ados" dagoela. Sailburuaren hitzetan, 2013 urtea arte EAEn poliki-poliki ezarriko den bulego judizialarekin, Justizia modernizatu egingo dute, eta "prozesu judizial osoa euskaraz egitea" ahalbidetuko du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun