Leioako Udalak eta Euskaltzaindiak lankidetza hitzarmena sinatu zuten irailean. Horrela, ezin modu hobeagoan, ospatu izan dute erakunde biek euskararen ikerketa eta zaintza helburutzat duen elkartearen 90. urteurrena. Leioako Udalak eta Euskaltzaindiak aurrera eramango duten lankidetza horren lehenengo ekintza toponimiari buruzko lan bat gauzatzea izango da. Bada denbora tokiko erakundeak Leioako toponimia berreskuratu eta normalizatzeko asmoz beka eman zuela eta horren barruan egindako lana hurrengo pausu baten zain dago gaur egun, udal iturriek azaldu dutenez. "Hitzarmenari esker, toponimiari buruzko lana borobildu ahal izango da. Besteak beste, egindako azterketa eta bere emaitzak formatu desberdinetan plazaratzea da", gaineratu dute. Gauzak horrela, liburuxka argitaratzea litzateke lehenengo pausua. Ondoren, baliteke liburu osoago edota CD batean biltzea lortutako izen eta datu guztiak. Besteak beste, Eusko Ikaskuntzarekin eta Aranzadi zientzia elkartearekin sinatu izan ditu hitzarmenak Leioako Udalak. Argazkian, neska-mutikoak Leioako San Bartolome baseliza ondoan abesten, Agate Deuna bezperan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun