Falange y Tradicion alderdi ultraeskuindarraren erasoak eta mehatxuak gaitzesteaz gain, eraso horien biktimei elkartasuna luzatu die gaur Eusko Legebiltzarrak. Halaber, Eusko Jaurlaritzaren Herrizaingo Sailak "neurri zorrotz eta eraginkorrak hartzen jarraitu behar" duela adierazi du Legebiltzarrak, "euskal gizartearen sentsibilitatea mintzen dituztenak Justiziaren esku jartzeko", Eitb.com-ek zabaldu duenez. EAk egindako mozio baten aurrean PSEk eta UPyDk aurkeztu zuten zuzenketa hori, Falange y Tradicion alderdiak egindako eraso eta mehatxuen aurrean Herrizaingo Sailak hartu edo hartuko dituen erabakien inguruan. Argazkian, Zigor eta Arkaitz Goikoetxearen aita-amen Azkorriko (Getxo) baserriaren kontrako erasoa ere beregain hartu zuen Falange y Tradicionek.
Euskal Herri osoan gertatutako 25 eraso faxisten artean, Sonia Polok jasandako heriotza mehatxuen egiteak eurak zirela adierazi zuen Falange y Tradicionek. Bilbotar peto-petoa, baina Sopelan hainbat urte bizi eta aurtengo Aste Nagusiko txupinera izan denari, egunkari batetik ebakitako bere argazkia eta 9mmko kalibreko parabellum bala bat zeraman gutun bat bidali zioten, Sergio Polo ETAko kidearen arreba izateagatik, PPk eta PSE-EEk bere aurka egindako kanpainaren ostean. Zigor eta Arkaitz Goikoetxearen aita-amen Azkorriko (Getxo) baserriaren kontrako erasoa ere eurek egina dela esan zuen Falange y Tradicionek. "Zigor hiltzaile", "Hilda zaude", "Gora Espainia terrorista" eta "Hil zaitezte" leloak espainolez pintatu eta atariko oin-zatarra eta sasi batzuk gasolinaz erre zituzten ezezagunek, uztailaren 17an. Bitartean, indar polizial eta botere politikoek faxistak harrapatzeko "inolako asmorik" ez dutela adierazi zuen Amnistiaren Aldeko Mugimenduak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun