Euskal Herri osoan gertatutako 25 eraso faxisten artean, Sonia Polok jasandako heriotza mehatxuen egiteak eurak zirela adierazi zuen Falange y Tradicionek. Bilbotar peto-petoa, baina Sopelan hainbat urte bizi eta aurtengo Aste Nagusiko txupinera izan denari, egunkari batetik ebakitako bere argazkia eta 9mmko kalibreko parabellum bala bat zeraman gutun bat bidali zioten, Sergio Polo ETAko kidearen arreba izateagatik, PPk eta PSE-EEk bere aurka egindako kanpainaren ostean. Zigor eta Arkaitz Goikoetxearen aita-amen Azkorriko (Getxo) baserriaren kontrako erasoa ere eurek egina dela esan zuen Falange y Tradicionek. "Zigor hiltzaile", "Hilda zaude", "Gora Espainia terrorista" eta "Hil zaitezte" leloak espainolez pintatu eta atariko oin-zatarra eta sasi batzuk gasolinaz erre zituzten ezezagunek, uztailaren 17an. Bitartean, indar polizial eta botere politikoek faxistak harrapatzeko "inolako asmorik" ez dutela adierazi zuen Amnistiaren Aldeko Mugimenduak.
Guardia Zibilak ordenagailuak, dokumentazioa eta material ezberdina aztertzeko eraman du Falange y Tradicionen aurkako operazioaren ondorioz egindako miaketetan.
Atxiloketen bideoa plazaratu du mugimendu antifaxistak:
Guardia Zibilak bost pertsona atxilotu ditu Nafarroa eta Zaragozako toki ezberdinetan, Falange y Tradicion talde faxistak egindako eraso eta mehatxuen egileak direlakoan. Polizia iturriak aipatuz, Europa Press albiste agentziak (espainolez) zehaztu duenez, Sunbillan eta Orkoienen JI.I.S. bizkaitarra eta J.L.M. atzeman dituzte, hurrenez hurren. Horiek lirateke "ardura maila handiagoa" luketenak. Barañainen, berriz, D.M.E. y F.D.T. atzeman dituzte. Miaketak ere izan dira zenbait etxebizitzetan. Azkenik, beste pertsona bat atxilotu dute Villanueva de Gallegon, Zaragozan. Poliziako iturrien arabera, atxilotuak (B.P.I.) 23 urte ditu eta Irun da bere jaioterria. Goizeko zazpietan harrapatu dute Villanueva de Gallegon duen etxebizitzan, antza ohiko bizilekua, eta Aragoiko hiriburuko polizia-etxeren batean dago. Argazkian, Zigor eta Arkaitz Goikoetxearen aita-amen Azkorriko (Getxo) baserriaren kontrako erasoa ere beregain hartu zuen Falange y Tradicionek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun