Orain arte jokatutako final laurdenetan sorpresak izan ditugu eta nork daki Laudion zer gerta daitekeen. Lamuza Granja kiroldegian 1100 lagunentzako lekua egokituko da eta momentuz 550 sarrera saldu dira. Kiroldegiko leihatilan jarriko dira salgai arratsaldeko 16:00etatik aurrera: sarrera arruntak 9 euro balioko ditu, baina bazkideek 6 eurotan eta 16 urtera artekoek 4 eurotan eskuratu ahal izango dute. Kiroldegiko ateak 16:30ean irekiko dira. Sarrera internet bidez erosten duenak etxean inprimatuta eraman beharko du Laudiora. Azken saioan izan ziren leku arazoak ikusita, bertsozalearen erosotasunerako eta antolatzaileen erraztasunerako saio guztietarako sarrera-bonoa daukatenei zein internet bidez sarrera erosita saiora doazenei, garaiz joateko eskatu diete antolatzaileek.
Kontuak kontu, Fredi animatzera joaterik ez dutenek ere zuzenean jarraitu ahal izango dute kanporaketa. Internetez, bertsoa.com-en eta bertsoplaza.tv-en bideoak eta Info7.com-en audioak izango dituzte horretarako. Irratiz, berriz, Info7 irratiak FMko 103.2 frekuentzian zabalduko du ekitaldia 17:00etatik aurrera eta berarekin konexioa egingo du Koska irratiak FMko 108.0n.
Laudioko Lamuza Granja kiroldegian jokatuko da, larunbat honetan (urriak 24), Bertsolari Txapelketa Nagusiko lehen fasearen seigarren eta azken saioa, 17:30ean hasita. Giro beroa aurreikusten du Bertsozale elkarteak. Izan ere, bihar bertan erabakiko da zeintzuk izango diren finalaurrekoetarako pasea eskuratu duten bertsolariak. Jone Uria eta Xabi Paya algortarrek eskuan dute jada finalaurrekoetarako txartela, aurreko kanporaketetan sailkatu baitziren. Fredi Payak, berriz, Laudioko saioa irabazi edo, kasurik okerrenean, 634 puntu beharko ditu finalaurrekoetara heltzeko, orain arteko sailkapenari erreparatuta. Aurrean beste bizkaitar bi eta hiru gipuzkoar izango ditu aurrean Algortako Bertsolari Eskolakoak (ALBE). Fredi da seietatik Txapelketa Nagusian eskarmentu gehien duena; aurtengoa hirugarren aldia izango du. Onintza Enbeitak, Iñigo Izagirrek eta Jon Martinek bigarren aldiz kantatuko dute Txapelketa Nagusian. Miren Amurizarentzat eta Arkaitz Oiartzabal “Xamoa”-rentzat, berriz, lehenengo aldia izango da. Lierni Altunaren aginduetara abestuko dute sei bertsolariok. Argazkian, Fredi Paya dagoeneko finalaurrekoetarako txartela eskuratu duen bere anai txiki Xabirekin, 2008ko Bizkaiko Txapelketaren finalean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun