Barrikako Meñakoz hondartza inguruan, Zabaletxeko aztarnategiko prospekzio geofisikoa osatzeko lanak aurreko asteburuan egin ziren, urriaren 23tik 25a bitartean. Lan horietan aritu ziren Mikel Agirre arkeologoa, Francisco Garcia Valentziako Unibertsitate Politeknikoko irakaslea eta Arantza Aranburu Euskal Herriko Unibertsitateko irakaslea. Aztarnategi hareatsua da eta balio handikoa gainera, Agirrek azaldu zuenez: “hareatza hori Pleistozeno garaiko pilaketa da, ehun mila urte izan ditzaketen metaketekin. Antzinatasun hori dela-eta, informazio garrantzitsua eman dezake klima, tenperatura eta landarediari buruz. Halaber, lore-hauts fosila izan dezake”. Gainera, gizakien aztarnak ere aurki daitezke bertan. Aberastasun paleontologiko handia duen ingurua da, sukarri aztarnategi ugari baitaude. Harri horrekin egiten ziren era guztietako lanabesak. Indusketa lanak hurrengo azaroaren 2an hasiko dira eta hile osoan zehar garatuko dira, azaroaren 30a arte. Argazkian, asteburuan egindako prospekzio lanak.
Agirrek azpimarratu zuenez: “ikuspuntu geopaleontologikoa jarraituz ari gara lursailaren balorazioa egiten, duen aberastasuna neurtzeko asmoz. Horretarako radar elektromagnetikoa erabiltzen dugu. Radarrak lurraren informazioa hiru dimentsiotan ematen digu. Aparatu horren bidez jakingo dugu azpiegiturak, su arrastoak edota zutoinak dauden. Ondoren zutikako ebaketa egingo dugu eta analisi desberdinak burutuko ditugu”, azaldu du arkeologoak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun