Lagun bat atxilotu dute Erandion edari alkoholdunen eraginpean gidatzea egotzita
Hogeita bi gidari atxilotu dituzte alkoholemiagatik asteburuan EAEko errepideetan: sei Bizkaian, hamabost Gipuzkoan eta bat Araban, Eusko Jaurlaritzaren Herrizaingo Sailak zehaztutakoaren arabera. Atxilotuetako bost zirkulazio istripuetan nahasita egon dira; ezbeharrak Mallabian, Donostian, Iruran, Errenterian eta Hernanin jazo dira. Bizkaian, larunbatean, pertsona bat atxilotu zuten Bilbon, semaforo bat gorri zegoela pasatu ostean. Mallabian beste gidari bat atxilotu zuten, Trabakua mendatean istripua izan ostean; ezbehar horretan, bi autok aurrez aurre jo zuten elkar eta, ondorioz, gidarietako bat zauritu zen. Horrez gain, A-8an (Barakaldon) ibilgailu bat geldiarazi eta gidaria atxilotu zuten, herritar batek salatu baitzuen pertsona bat edaten eta gorputz erdia autotik ateratzen ari zela gidatzen zihoan bitartean, polizia iturriek diotenez. Igandean, berriz, pertsona bat atxilotu zuten Erandion egindako alkoholemia kontrol batean, eta beste bi pertsona atxilotu zituzten Sestaon eta Barakaldon, ausarkeriaz gidatzea egotzita. Bestalde, Eusko Jaurlaritzako Trafiko Zuzendaritzak urriaren 19an abiatu zuen ibilgailuen abiadura kontrolatzeko hamabost eguneko kanpaina. Argazkian, Ertzaintzaren trafiko kontrola.
Gipuzkoan zortzi pertsona atxilotu zituzten larunbatean; Hernaniko (2), Pasaiako eta Urnietako bigarren mailako errepideetan; A-8an (Donostian) eta N-1 errepidean (Errenterian), bi auto errepidetik irten zirenean; eta Errenteriako herrigunean, patruila batek modu bitxian gidatzen ari zen pertsona bat ikusi zutenean. Gaur (igandea) zazpi lagun atxilotu dituzte, horietako hiru Azpeitian eta Lasarten (2) egindako bi kontroletan, bat Irungo herrigunean, eta beste bat Urnietakoan; azken udalerri honetan ziklomotor baten gidaria. Azkenik, beste bi gidari atxilotu dituzte Errenteria eta Hernaniko bigarren mailako errepideetan istripu bana izan ostean; ez da inor zauritu. Bestalde, Araban gaur (igandea) egin dute atxiloketa bakarra, Gasteiz zeharkatzen duen errepide nagusi batean jarritako alkoholemia kontrol batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun