Bidegorri zabal horrekin leioaztarrek natura eta ibilbide polita izango dute eskura, kirola egiteko edota ibilaldi lasai batez gozatzeko. Bide berezi horren helburua herriko parkeak lotzea da, hauen artean garrantzizkoak izanik, adibidez, 60.000 metro koadro azalera duen Pinosolokoak edota 200.000 metro koadroko Artatzakoak. Leioako Udalak egun esku artean duen proiektu baten barruan kokatzen da bidegorrien luzapena, aipatu dutenez. Tokiko arduradunen hitzetan, "Udalaren helburua txirrinduentzako bidea handitzea da batik bat, herriko hainbat gune ezberdin lotuz". Sare erraldoi hori Leioako metro geltokian hasten da, eta Sabino Arana kaletik (Udondoko Bulebarrean eginik dagoen zatiarekin), Elexalde parkeko bidegorriarekin lotuko da. Puntu horretatik aurrera hiru aukera daude, EHUren Leioa eta Erandioko campusera abiatu, Getxoko mugara arte joan edo Basaez auzora heldu.
Ariketa guneak
Bidegorriaren parean, Udalak hainbat gune jarri ditu, ariketa fisikoa egin ahal izateko. Bereziki, nagusientzat daude zuzenduta bereziki aparatuok, baina edozein herritar erabil ditzake. Zehazki hiru zonaldeetan egongo dira: Elexalde eta Pinosolo parkeetan, eta hirugarrena Udondoko bulebarrean jarriko dute laster. Azken aldaketa horiekin bidegorriak sustatzea bilatzen da, mugikortasun jasangarria bultzatu eta nagusien aisialdiarentzat eskariei aurre egitea. Emandako azken pausu horrek 55.200 euroko kostua izan du, hauetatik 35.871 euro Bizkaiko Foru Aldundiak jarri ditu.
Egun, Pinosoloko parkean amaitzen den bidegorri zatia Artatza parkea zeharkatuko duenarekin lotuko dute, Getxo udalerriko mugara heldu arte, udal leioaztarreko iturriek jakinarazi dutenez. Bizkaiko Foru Aldundiak finantzatuko du 400.000 euroko aurrekontua izango duen luzapen hori. Dagoeneko obra lizentzia eskatuta dago. Bidegorri zati berriarekin eta orain dela gutxi egindakoarekin, bizikletaz ibili ahal izateko 2.000 metrotako bidea izango da Leioan. Herriaren erdigunea eta Artatza parkea lotuz, bidean Elexalde parkea eta Pinosolo zeharkatuz eta Getxoko mugan bertan geldituko da. "Etorkizun batean Getxoko bidegorri sarearekin lotzea da asmoa eta amets bat errealitate bihurtu, leioaztar batek hondartzara txirrinduan heltzea posible izatea", azaldu dute tokiko arduradunek. Horrela, "jasangarriago izateko eta mugikortasun hobeago baten alde" lan egiten jarraitzen du Leioak, "herrian zehar mugitzeko garraiobide osasuntsuak erabiltzeko medioak jarriz", gaineratu dutenez. Argazkian, ariketa fisikoa egiteko hainbat tresna jarri dituzte bidegorrietatik hurbil / © Leioa.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun