Izan ere, Joseba Markaidaren aburuz, ETArekin ez da egongo ez elkarrizketarik ezta negoziaziorik ere: "elkarrizketa haria ezabatuta dago oinarrizko arrazoiengatik: bandaren zuzendaritza ez da elkarrizketaren aldekoa eta Estatuaren aldetik ez dago zer negoziatzerik, erruki hutsa ez bada".
Zaituren datuen arabera, 60.000 pertsona bizi dira ETAk jazarrita edo erbestean. Arartekoak, bere aldiz, 43.000 lagun direla dio eta Mikel Buesak Ermuako Foroarentzat 2007an egindako zenbaketan erbesteratuak 383.700 zirela bota zuen lasai asko.
Markaidak molotov koktelez egindako hainbat eraso bizi du Azkorriko etxean. 2001ean, bere emazteak eta seme batek erredurak jaso zituzten sua itzaltzean. 2002ko irailean, Markaidaren kontrako heriotza-mehatxuak zituzten pintadak salatu zituen PSE-EEk. 2005ean, berriz, botatako sei molotov koktelek kalte arinak eragin zituzten etxeko fatxadan. Azkenik, 2007an, Uribe Kostako hamaika gazteren aurkako sarekada argudiatzeko autoan, Baltasar Garzon Espainiako Auzitegi Nazionaleko epaileak lau haizetara zabaldu zuen Markaidaren etxearen aurkako eraso "saiakera" bat zapuztu zuela Poliziak.
Joseba Markaida Berangoko PSE-EEren zinegotzia eta Azkorriko bizilagunak Murtzia Eskualdeko (Espainia) Terrorismoaren Biktimen II Astean parte hartu berri du. Markaidak "Guztiok gara biktimak" eta "Biktimen batasuna" gaiei buruzko mahai-inguruetan hitz egin zuen pasa den asteartean, hilak 20. Azkorrikoak Zaituko (ETAk Eragindako Jazarpen, Mehatxu eta Erbesteen Biktimen Aldeko Elkartea) presidente gisa mintzatu zen, bere ondoan Mapi de las Heras AVTko idazkari nagusia eta Joaquin Vidal FAVTko presidentea mintzakide izan zituela. Zinegotzi berangoztarrak Vegamediapress Murtziako digitalari adierazi dionez, Zaituk ETAren inguruko ikerketa egin du eta emaitza ETA "grapotzen ari delako" bere azkenera doala ei da. Bere ustez, "ETAk botere politikoa galdu eta diruagatik baino ez da mugitzen egun". Egungo etakideak "diru errazaren atzean joango diren mafia talde txikiak bilakatuko dira", Markaidaren arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun