Ramon Rubial PSOEko buruzagi historiko erandioztarra jaio zenetik 103 urte igaro direla ospatzeko, Bilbon egin du gaur ekitaldia PSE-EEk. Bizkaiko hiriburuan bizi izan tokitik gertu, Ibaizabal parean dagoen estatua aurrean egin diote gorazarre Rubiali. Agerraldian izan dira Jose Antonio Pastor buruzagi sozialista, Rodolfo Ares Herrizaingo sailburua eta Jesus Egiguren PSE-EEren presidentea. Besteak beste, bere hitzetan, "ETAren morroiekin batera kalera irteten diren" eta Estatutua gutxiesten duten abertzaleen kontra jo du Pastorrek, ekitaldian egindako adierazpenetan. EAJrekin aurrekontuen egonkortasunerako akordioa sinatzeko 24 ordu besterik geratzen ez direnean, "Gernikako Estatutua gutxiesteko gezurrak" erabiltzea egotzi die jelkideei, Eitb.com agerkari digitalak zabaldu duenez. Bitartean, Lentxu Rubial buruzagi sozialista historikoaren alabak ere hitza hartu du omenaldian. Horren alaba Eider Gardiazabalek Bilboko zinegotzi ardurari uko egin orain gutxi, Europako Legebiltzarrean, Bruselan, erabateko arduraldia izateko, PSOEren ordezkari bezala. Orain gutxi ezkondu zen Cadizen, Patxi Lopez ere bertan egon zela. Horregatik galdu zuen urriaren 12ko Hispanitatearen Egunaren desfile militarra lehendakariak. Argazkian, Ramon Rubiali Bilbon, Ibaizabalen aurrean, jarritako estatua / cc-by-nc Pixelillo.
Ramón Rubial (Erandio, 1906 - Bilbo, 1999) metalurgian langilea eta politikari sozialista garrantzitsua izan zen. 1920an UGT sindikatuan hasi zen militatzen eta 1922an PSOEn afiliatu zen. 36ko Gerra Zibilean borrokatu zuen, errepublikaren alde, eta 1937an atxilotu eta 30 urteko kartzela zigorra ezarri zioten. Hala ere, 1956ko abuztuaren 23an askatu zuten eta klandestinitatean lan egiteari ekin zion. Alderdi sozialistaren presidentea izan zen 1976tik 1999an hil arte. 1977an Bizkaiko senatari bihurtu zen eta 1978tik 1979ra Euskal Kontseilu Orokorraren presidentea. Gaur egun bere izena dauka Txurdinagan PSE-EEk daukan egoitza. Horrez gain, Bilbon bizi izan tokitik gertu bere irudi bat jarri du Udalak, eta Abandoibarrako kaleetako bati bere izena jarriko zaio. Bere jaioterrian ere Ramon Rubial du izena kaleetako batek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun