Hilero bezala, bihar iluntzerako, urriko azken ostiralerako alegia, hainbat kontzentrazio deitu du Etxerat euskal preso politikoen senideen elkarteak, Euskal Herri osoan. Uribe Kostan eta Erandion bederatzi hitzordu izango dira: Armintzako bus geltokikoa kenduta, 19:30ean izango dena, 20:00etan egingo dituzte elkarretaratzeak herrietan. "Gerra zikina eta errepresio politika" salatzeko baliatuko dituzte horiek, Uribe Kostako Amnistiaren Aldeko Mugimenduak jakinarazi duenez. Gainera, azken ostiraleko mobilizazioaren barruan, Bisi Unanue zenari omenaldia egingo zaio, bihar bertan, Algortan, ezker abertzaleak deituta. Hitzordua 20:30ean jarri dute, Telletxe plazan, aurreko kontzentrazioaren ostean. Uribe Kostako AAMk azaldu duenez, "Bisi irailean hil zen, gaixotasun baten ondorioz. Algortako abertzaletasunaren erreferentzia izan da urte askoan: indarra eta kemenaren irudia izan da herrian. Erbestea eta espetxea ere ezagutu izan ditu, baina beti askatasuna lortuko bada aurrera egiteko aldarria zabaldu du gure artean". Elkarretaratzeen ondoren, taloak egingo dituzte Algortako Amnistia, Berangoko Sei Herri, Itzubaltzeta / Romoko Branka eta Leioako Kurkudi tabernetan. Argazkian, Bisi Unanue zenaren omenaldia iragartzeko kartela / Etengabe.
Azken ostiraleko elkarretaratzeei dagokionez, 19:30ean, Armintzan, bus geltokiaren aurrean izango da. 20:00etan, berriz, Erandion, metro aurrean; Leioan, Bulebarrean; Itzubaltzeta / Romon, Xake plazan; Algortan, Telletxe plazan; Berangon, Gudari enparantzan; Plentzian, zubiaren ondoko "Piruli" plazatxoan; Sopelan, udaletxe aurrean eta Urdulizen, BBVAren aurrean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun