Euskalmetek jakinarazi duenez, hori izango da udazkeneko lehen denborale aipagarria, orain arte izan dugun eguraldi egonkorra eta joan den asteko tenperatura altuekin bukatuko duena. Horrela, olatu indartsuez gain, euri jasa handiak eta tenperaturak nabarmen jaistea (10-15 gradu artean mantenduko dira) ere espero da. Iragarpen horien aurrean, Herrizaingo Sailak estolderia sareak aztertzea gomendatu du oztopoak (hostoak edo adarrak, esaterako) kendu eta sakon garbituz, ura errazago pasatzea bermatzeko.
Olatu handiak
Bihar, asteazkena, olatuaren altuera 5-6 metro artekoa izatera hel daiteke eta, egunaren amaieran, 6-7 metro ingurukoa. Ipar-mendebaldeko hondoko itsasoak 4-5 metro inguruko olatuak altxa ditzake (egunaren amaieran 5-6 metrokoak).
Ostegunean, berriz, olatuaren altuera 6 metro ingurukoa izango da, egunaren amaieran 5-6 metrora jaitsiz; ipar-mendebaldeko hondoko itsasoak 5-6 metroko olatuak altxatuko ditu. Hurrengo egunetan olatuaren altuera adierazgarria 5 metro ingurukoa izango da, altuago astearen amaieran.
Asteazken eta ostegunerako olatuek eragindako alerta egoera indarrean jarraituko duela adierazi du Eusko Jaurlaritzaren Herrizaingo Sailak. Horretaz gain, batez ere Kantauri aldean eman daitekeen euri eta haize denboralearen inguruan ohartarazi du. Prezipitazioak handiak izango dira ondorengo egunetan, eta baliteke metro koadroko 200 litro pilatzea 5 egunetan, Herrizaingo Sailak zehaztu duenez. Haizeari dagokionez, abisu horia mantenduko dela ohartarazi die herritarrei Getxoko Babes Zibilak. Bihar, asteazkenean, haizeguneetan, mendebal/ipar-mendebaldeko haize-boladen abiadura 100 kilometro ordukoa izan daiteke, kostaldean batez ere; baita asteazkeneko azken orduetan eta ostegun goizaldean ere. Hori dela eta, Algortako Portu Zaharrean, Ereaga hondartzan eta Arriluze kaian aisialdiko jarduerarik ez egitea gomendatu dute. Era berean, egun horietan kostaldean kirolik ez egitea; itsasalde, kai-mutur eta itsas labarretatik ez paseatzea; itsasontziak ez erabiltzea; eta amarrak berrikustea gomendatu dute. Azkenik, olatu handiak direla eta, Ereaga hondartzako eta Portu Zaharreko sarbidea itxi egin daitekeela iragarri du Babes Zibilak. Argazkian, itsasontziak Arriluze inguruan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun