Kirolari getxoztarrek talde bezala parte hartuko dute lasterketan, babesleen izenpean eta "Getxo" marka pean, euren kategorian; 50 urtetik gorako beteranoetan, alegia. 400 kilometro inguruko ibilbidea bete beharko dute, lau etapa gogorretan zehar, ziurrenera, hezetasun maila handiak, bero handia, altitudeak eta bide malkartsuek, batez ere lokatzak, lasterketa baldintzatuko baitute. Lasterketa Ozeano Bareko kostaldean, Jaco herrian, hasi eta Karibeko kostaldean, Puerto Limonen, amaituko da, basoa zeharkatu eta gero. Hiru txirrindulariek esan dutenez, oso lasterketa gogorra da, batez ere, bere lehen etapan “5 ordu jarraian eman beharko ditugulako basatzan sartuta”, eta esperientzia oso garrantzitsua da. Baina, giltza, azaldu dutenez, “apal hastea da, arlo psikologikoaz gain fisikoak ere oso garrantzi handia duelako". "Elkarri laguntzea eta bat egitea funtsezkoa da, bestela oso gogor egiten da eta gorriak ikusten dituzu”, zehaztu du Luis Uribeetxebarriak.
Euren helburua da, besterik gabe, proba amaitzea da. Eta, horretarako, gogor egin dute lan duela gutxi egindako Euskadi Extreme lasterketa bezalakoak jokatuz. Konkistatzaileen Ibilbidea lasterketaren espiritua “erronka pertsonalean datza, norberaren buruaren aurkako borrokan, helburua helmugara ailegatzea baino ahal den guztiaz gozatzea dela”, aitortu du Juantxu Abasolok.
Mendi bizikleta lasterketa gogorrenetako batean parte hartuko dute hiru getxoztarrek
Mundu mailan, etapaz etapa egiten den mendi bizikleta lasterketa gogorrenetako batean parte hartuko dute hiru beterano getxoztarrek; Konkistatzaileen Ibilbidea delakoan, alegia. Juantxo Abasolok, Luis Uribeetxebarriak eta Amadeo Depritek, 60, 54 eta 52 urte dauzkate, hurrenez hurren. Laster, Costa Rica aldera joko dute azaroaren 11tik 14ra bitartean aurten 17. ekitaldia izango duen proba jokatzeko. Lasterketan, beste 450 bat txirrindularirekin batera lehiatuko dira getxoztarrak, Roberto Heras ziklista espainiar ospetsua eta Tinker Juarez mexikarra, mendiko bizikletako mito bizia, bertan direla. Getxoko Udalak ekimenari babesa eman nahi izan dio eta, hartara, 2.000 euroko diru-laguntza eman die hiruei, bidaiaren gastuei aurre egin ahal izateko. Abasolo, Uribeetxebarria eta Deprit aste honetan bertan abiatuko dira Costa Ricara, lasterketa hasi aurretik egun batzuetan bertako girora moldatu ahal izateko. Argazkian, hiru txirrindulariak Alvaro Gonzalez Kirol zinegotziarekin, gaur goizean emandako prentsaurrekoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun