Seme-alabekin euskaraz jolasten irakatsiko diete aita-amei Gorlizen
2009ko aza. 4a, 13:02
Uribe Kostako Mankomunitateko Euskara Zerbitzuaren bitartez, "Katramila" izeneko ikastaroa eskainiko die, 0 eta 6 urte bitarteko haurren guraso zein hezitzaileei, Gorlizko Udalak. Urtxintxa astialdiko eskolak berriki plazaratutako "Katramila, goizetik gauerako abesti-jolasak" liburu-diskoan bildutako euskal jolas eta kantak aita-amei eta irakasleei erakustea da ekimenaren helburua, umeekin euskaraz jolastu ahal izateko. Horrenbestez, 7 eta 20 lagun arteko taldea osatuko dute, bi orduko eskola emateko. Saioa azaroaren 27an, ostirala, izango da, 18:00etatik 20:00etara, Gorlizko kultur etxean; nola ez, euskaraz. Parte-hartzaileek 10 euroko matrikula ordaindu beharko dute. Interesatuta egonez gero, informazio eta izen-emate orria Uribe Kostako Mankomunitateko Euskara Zerbitzuan eta aipatu kultur etxean izango dira eskuragarri. Izena emateko epea hilaren 13ra arte egongo da zabalik. Argazkian, joan den ostegunean aurkeztu zuten "Katramila, goizetik gauerako abesti-jolasak" liburu-diskoa."Agerian dago gure seme-alabak nahi baino gehiagotan jolasten direla gaztelaniaz, bai euskal jolasak ezagutzen ez dituztelako, bai gaztelaniazkoak euskaraz egiten ez dakitelako. Ekintza honen bidez, gurasooi zuon seme-alabekin euskaraz jolastu ahal izateko baliabideak eskaini nahi dizkizuegu", azaldu dute udal arduradun gorliztarrek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun