1999ko apirilaren 24an Itzubaltzeta / Romoko San Jose elizako atarian lo egiten ari zela, hil arte jipoitu zuten -burdin tutuak zirela medio- Alejo Aznar hamar bat gaztek. Bertako gazte asanbladak elkarretaratze jendetsua egin zuen elizaren aurrean eta faxistei leporatu zien erailketa. Hainbat webguneek gehiago zehaztu eta Bases Autonomas taldeari leporatu zioten. Aznar gaixo terminala zen. Gainera, drogamenpekotasuna zuen eta aurretik beste eraso batzuk pairatu zituen, tartean erretzen saiatu zuteneko hura. Bere hiltzaileetariko bat baino ez zuten kondenatu, eta adingabekoa izateagatik, 80 orduko lan zigorra ezarri zioten, "zuhurtziagabekeriazko giza hilketagatik".
EHGAMek eta Sare Antifaxistak zabaldutako manifestua:
Gaur, azaroak 9, faxismoaren aurkako eguna delako mobilizatzen gara EHGAM eta Sare Antifaxista. Egia da, gure herrietan, nahi izango genukeen askatasun eta aniztasunez sekula ezin izan garela bizi, baina azken urteetako gertaerekin eta, batez ere azken hilabeteotakoekin, oraindik zailagoa bihurtu da. Horren erakusle dira erakunde falangistetatik egindako eraso faxistak.
Herri-erakunde ezberdinetan lan egiten dugunon kontrako erasoak egon dira azken urteotan: pintadak, jipoiak, mehatxuak eta hilketak.
Hilketa hauek gogoratu beharrekoak dira: Alejo Aznar, Itzubaltzeta / Romon; Aitor Zabaleta; Hassan Al Yahami; Mourad al Abidine; Augusto Ndombele Domingos; Lucrecia Perez eta Karlos Palomino, Madrilen; Roger, Bartzelonan; eta Guillen Agullo i Salvador, Castellon. Horrez gain, Donostiko EHGAMeko kide bati emandako jipoia, Bilboko txupinera bala batekin mehatxatzea, hainbat euskal herritarrek gutun bidez jasotako mehatxu eta irainak, lokal eta ibilgailuei egindako erasoak, eta etorkinei egindako etengabeko erasoak hor daude. Elkartu eta egoera honi modu sendoan aurre egiteko sasoia heldu da.
Pertsona guztien askatasunen defentsa eta kultura, jatorri, aukera sexual, ideologia... ezberdinen aurrean dauden fobia guztien kontra lan egitea guztion zeregina da. Arrazakeria, transfobia, lesbofobia eta homofobia gizartearen arazoak direla ulertzen dugu eta, beraz, gizarte osoak lan egin behar du gure artetik desagerrarazteko.
Badakigu talde faxistak ez daudela bakarrik eta zigorgabetasun politiko, polizial eta judiziala daukatela. Helburuak eskura nork jartzen dizkien eta nork babesten dituen ere badakigu, gaur egungo Euskal eta Espainiar gobernuek adibidez, P$E buru dela bi gobernuetan. Auzitegi Nazionalak erasotu beharreko tokiak markatzen ditu, PP eta P$E-k mehatxatu beharreko txupinera seinalatzen dute… Harrigarria da, atxilotutakoak faxistak direnean, errugabetasun presuntzioa zelan errespetatzen duten ikustea, beste inoiz errespetatzen ez dena. Harrigarria da baita herri mobilizazioak debekatuta dauden egoeran bizi garen bitartean, epaitegiek faxistak gure kaleetan zehar lasai ibiltzen uztea, beraiekiko ezberdina den guztiaren kontra gorrotoa ereinez.
Gu ez gara faxistak bezalakoak, ez dugu izan nahi, gure lana pertsona guztiok libre bizi ahal izateko borrokatzea baita, gizarte anitza nahi dugulako, kolorez betetako gizartea, lekurik ez duen kolore bakarra mugimendu nazi-faxistena izan dadin. Hauxe da gure helburua.
Bukatzeko Euskal Herrian lanean ari garen erakunde ezberdinak deitu nahi ditugu faxismoaren kontra elkartzeko, elkarrekin lan egin dezagun talde hauen jarrera bakoitza salatzeko. Izan ere beraiek politikoak, kazetariak, enpresariak, militarrak eta epaileak dauzkate beraiekin, baita euren erakunde barruetan ere, guk geure indarra daukagu eta hori ez da gutxi ez, asko baizik. Borroka antifaxista guztion borroka da, eta gaitz hau gelditu egin behar dugu denon artean. Indarrak elkartzea, gure arteko elkartasuna eta borroka bateratua dira faxismoari aurre egiteko errezeta bakarra.
Gure askatasunaren alde, duintasunagatik: faxismo gehiagorik ez!
Faxismoaren aurrean mila kolore!
Orain arte bat egin dute:
EHGAM
Sare Antifaxista (Euskal Herriko Antifaxista Taldea).
Euskal Komunistak-PCPE.
Gazte Komunisten Kolektiboak (GKK).
Ekintza Antifaxista Iruñerria.
Boltxe Kolektiboa
Bilboko Elkartzen
GKB Euskal Herria
Kimetz
Iratzarri
Azaroaren 9ko Faxismo, Sexismo, Diskriminazio eta Arrazakeriaren kontrako Nazioarteko Egunaren harira, astelehen honetarako elkarretaratzea deitu dute Euskal Herriko Gay-les Askapenerako Mugimenduak (EHGAM) eta Sare Antifaxistak. Hitzordua 19:30ean jarri dute, Bilboko Arriaga plazan. Horren bidez, azken aldian izaten ari diren jatorri ezberdinetako eraso faxistak salatuko dituzte. Tartean, Donostiako EHGAMeko kide bati emandako jipoia eta Sopelan hainbat urtez bizi eta aurtengo Aste Nagusiko txupinera izandako Sonia Polori egindako heriotza mehatxua izan dituzte hizpide erakunde biek. Azken horri, egunkari batetik ebakitako bere argazkia eta 9mmko kalibreko parabellum bala bat zeraman gutun bat bidali zioten. Beste askoren artean, Zigor eta Arkaitz Goikoetxearen aita-amen Azkorriko (Getxo) baserriak ere jaso zuen erasoa, uztailaren 17an. Horrez gain, azken urteotan "faxisten eskuetan eraildako" lagunak gogoratuko dituzte; Alejo Aznar Itzubaltzeta / Romoko eskale ezaguna zena, besteak beste. Argazkian, Alejo Aznarren omenez, Sare Antifaxistak plazaratutako kartela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun