Leioako Artisautza eta Gastronomia Azokak 30 urte beteko ditu asteburu honetan. Azaroaren 6tik 8ra bitartean, 29 eskulangilek hartuko dute Bulebarra: denetara 16 artisautza mota ezberdin (beira, egurra, zeramika, bitxiak...) ikusteko aukera izango da. Horretaz gain, produkturik gozoenak dastatzerik ere egongo da: patea, gazta, ogia, euskal pastela, itsasoko produktuak eta marmeladak, besteak beste. Baina, horiek guztiak probatu edota erosteaz gain, artisauek zelan lan egiten duten zuzenean ikusi ahal izango dute Bulebarrean batzen direnek. Horretarako, hainbat tailer jarriko dituzte: beira, harri zein zur lanketa; upelgintza; forjaketa; eta ehoziri-lanari buruzkoak, hain zuzen. Ohi bezala, gazta, ogia, txakolina, sagardoa... dastatzeko hitzordu bereziak ere jarri dituzte; larunbat eta igandean, 12:00etatik 14:00etara. Azoka 17:00etan zabalduko dute ostiralean eta 21:00etan itxi. Larunbat eta igandean, berriz, 10:30etik 14:30era eta 17:00etatik 21:00etara egongo da zabalik. Argazkian, azoka ugaritan parte hartzen duen Roman Aduriz oiartzuarra, egurrezko kateak egiten.
Leioako Artisautza eta Gastronomia Azokara hurbiltzen direnek erakusketa batekin gozatzeko aukera izango dute aurten. "Utensilios para la fabricacion de pan y pasteles de Pastas Urrutia" lelopean, hainbat tresna egongo dira ikusgai, Jose Manuel Urrutiaren eskutik. Bestalde, zerbait erosten duten guztien artean, produktuen zozketa egingo dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun