Europako Emanaldi Onenaren saria eskuratzerik ez zuen izan bart We Are Standard musika talde getxoztarrak. Orain hiru aste, Fangoria, Macaco, Nena Daconte eta Russian Red atzean utzi zituen boskoteak, MTV Europe Sarietarako Espainiako ordezkari bilakatuz. Horrela erabaki zuten MTVren ikusleek. Hala ere, oraingoan, Manga talde turkiarra aukeratu dute horiek, Europako Emanaldi Onenaren sarirako. Sari banaketa Berlingo (Alemania) O2 World Arena aretoan egin zuten ostegun gauez, Kate Perry abeslari estatubatuarrak aurkeztuta. Gainera, Shakirak, U2k eta Tokyo Hotelek zuzenean jo zuten. Ekitaldian, Beyonce abeslari estatubatuarrak jaso zituen sari nagusiak (Emakumezko Artista Onena, Abesti Onena eta Bideo Onena), eta MTV telebista-kateak Michael Jackson omendu zuen. Argazkian, We Are Standard taldea Madrilen emandako kontzertu batean / cc-by-nc-sa Andor.
We are Standard Getxon sortu zen 2002an, eta punk-funk eta dance-rock estiloak uztartzen ditu. Taldea bost pertsonak osatzen dute: Deu Txakartegi, Jon Agirrezabalaga, Javi Leta, D.W. Farringdon eta Juan Escribano. Haien lehen diskoa, "3.000 V-40.000 W", 2006ko martxoan publikatu zuen Mushroom Pillow diskoetxeak, eta harrera ona izan zuen zaleen artean. Dena dela, behin-betiko arrakasta 2008 urtean etorri zitzaien, "We Are Standard" izeneko bigarren diskoa publikatu zutenean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun