Gizon bat atxilotu dute Itzubaltzetan bikotekide ohiarengandik urruntzeko agindua hautsi duelakoan
Getxoko Udaltzaingoak 23 urteko gizona atxilotu zuen larunbat goizean, hilaren 7an, Itzubaltzeta / Romon, bere bikotekide ohiarengana 500 metro baino gutxiagora ez hurbiltzeko agindua haustea egotzita. Era berean, erabiltzen duen modua edozein izanda, bere bikotekide ohiarekin komunikatzeko debekua ere jasotzen du Getxoko epaitegiak emandako aginduak, udal iturriek zehaztu dutenez. Udaltzainak emakumea zaintzeko lanak egiten ari ziren bere etxe aurrean. Etxetik ateratzen ez zela ikusita, bere zain geratu ziren. Goizeko 9:40ak aldera etxe aurrean dagoen tabernatik irteten ikusi zuten andrea, urruntzeko agindua duen gizonarekin lagunduta; biek Leioarako bidea hartzen zutela, tokiko polizien arabera. Emakumea hiruzpalau metro aurretik zihoan, elkarrekin ez zihoazela itxurak eginda, aipatu dutenez. Tarteka, elkarri berba egiten zihoazen, inolako indarkeria edo arbuiorik gabe. Udaltzainek identifikatzeko eskatu zieten biei, baina atxilotuak engainatu nahi izan zituen, izen faltsua emanez. Baina, azkenik, bere benetako nortasuna aitortu zuen, Udaltzaingoak nor zen argi baitzekien.
Babestutako emakumeak, lehen une batean, ez zuen gizonak emandako izen faltsua gezurtatu, tokiko polizia iturrien arabera, baina handik gutxira elkarrekin zeudela aitortu zuen. Erasotua izan zitekeenaren aztarnak ere antzeman zizkioten andreari. Urruntzeko agindua haustea egotzita atxilotu egin zuten gizona, P.M.A. Leioako bizilaguna. Larunbatean bertan epailearen aurrera eraman zuten, eta ondoren aske geratu zen. Halaber, Fiskaltzaren aurrean hainbat izapide egin dituzte emakumea ere errudun izan zitekeelakoan, bere bikotekide ohiari hurbiltzen uzteagatik, epaitegiak urruntzeko agindua emanda bazuen ere. Keltse Eiguren zinegotziak gogoratu du Getxoko Udalaren Gizarte Zerbitzuetako Sailak (944 660 101) aholkularitza juridikoko zerbitzua eta arreta psikologikoa eskaintzen dituela eta Eusko Jaurlaritzako Telefono Arreta Zerbitzura (900 840 111), Udaltzaingora (944 660 202), Ertzaintzara (944 063 420) edo SOS Deiak larrialdietako zerbitzura, 112 zenbakira ere dei daitekeela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun