Huelvako (Andaluzia, Espainia) espetxean dauden euskal preso politikoek itxialdi mugagabeari ekin zioten atzo. A Coruña aldeko Curtis-Teixeiro presondegiko gatibuek ere bat egin dute protestarekin, Amnistiaren Aldeko Mugimenduak Askatu.org agerkariaren bitartez jakinarazi duenez. Ostiralera bitartean egingo dute itxialdia, "asteburuan espetxe horretan eta beste hainbatetan izan diren gertaerak salatzeko". Curtiseko espetxean Sergio Polo sopeloztarra eta Irantzu Gallastegi berangoztarra ere badaude, herritik 630 kilometro ingurura. Presondegi berean dira Xabier Garcia Gaztelu Irantzuren bikotekidea eta euren alaba Arane. Bestalde, Mikel Lizarribar Bilboko preso politikoak "berriz tratu umiliagarria" jaso duela salatu du Amnistiaren Aldeko Mugimenduak. Azaldu dutenez, "Lizarribar aurrez aurreko bisitarik gabe gelditu zen asteburuan, bere neskalaguna gorputzeko miaketa egitera ukatu egin zelako. Gertaera honek eztabaida sortu zuen Mikel eta espetxezain baten artean, eta espetxezainak mota guztietako irainak bota zizkion Mikeli, isolamendura eramatearekin batera. Honekin batera arakatze bortitz bat egin zioten Mikeli, lepotik heldu eta astindu egin zutelarik. Gertaera hau salatzeko gainontzeko euskal preso politikoak itxialdia burutu zuten arratsaldean. Gauez Mikel bere ziegara eraman zuten eta berriz bere kideekin batera aurkitzen da". Argazkian, presoen aldeko manifestazioa Algortan.
Orain gutxi urrian zehar izandako espetxe aldaketen berri eman zuen Amnistiaren Aldeko Mugimenduak. Dagoeneko ezaguna zen Jagoba Terrones berangoztarra Basauritik Albocasser herrian dagoen Castello II espetxera eraman zutela, atxilotu eta astebete beranduago. Baita Manex Zubiaga Algortako euskal preso politikoa Frantziako Chateauroux espetxetik atera eta Madrilera hegazkinez eraman zutela ere. Aitor Cotano gazte algortarra, berriz, Cadizko Puerto III espetxera bueltatu zuten, maiatzaren 8an egin behar zituzten diligentzia judizialak direla eta, Madrilera eraman ostean. Azkenik, urrian bertan, dilijentziak egiteko, Marije Fullaondo algortarra Villabonatik Madrilgo Soto del Real kartzelara eraman eta berriro bueltatu zuten Asturias aldera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun