Kamioien joan-etorriei dagokienez, "batez besteko kalkulua" egin da eta, horren arabera, tokiko arduradunek uste dute ordu laurdenero kamioi bat ibiliko dela. "Balorazio hori, ibilgailuen zirkulazioaren maiztasunarena, aldatu (gutxitu edo areagotu) egin daiteke lanak txikiagoak edo handiagoak badira", Loroñok aipatu duenez. Inguruko zirkulazioan trabarik ez sortzeko, obrara sartzeko eta bertatik irteteko lekua zainduko dute langileek. Halaber, udaltzainek, behar denean, sarbide horiek eta inguruko zirkulazioa zaindu eta ongi antolatuko dute.
Zaratari dagokionez, “ziurrenera lanek irauten duten artean enbarazurik nagusiena izango da, bereziki fase honetan, egun jakinetan eta, osagai naturalen gogortasunaren eraginez, intentsitate desberdinarekin sortuko bada ere", Komunikazio zinegotziaren arabera. "Halabeharrezko lan hauek eragingo dituzten arazoak ahal den guztian gutxitu aldera, neurri egokiak hartzea eskatzen diegi auzotarrei: esaterako, leihoak eta pertsianak zarratzea”, gaineratu du Loroñok.
Orain arteko lanak
Amaituta dauden lanei dagokienez, duela 3 hilabete "era ofizialean" hasi zirenetik, obrek aurrera egin ahala, ingurua hesiekin ixten joan direla azaldu Loroñok, "lanon eremua isolatu eta auzokideen joan-etorriei ahalik eta trabarik gutxien egiteko". Egun, lan-eremuaren %70 dago hesituta eta urtarrilean itxiko dute osorik, Basagoiti Etorbidean jarriko duten pasabidea amaitutakoan. Bestalde, ipinitako hesiaren eraginez, oinezkoen hainbat sarbideetan aldaketak izan dira. Horietako batzuk, halere, lehengora bueltatuko dira aipatu pasabidea zabaldutakoan, tokiko agintariak aipatu duenez. Halaber, ibilgailuen zirkulazioan ere aldaketak egin dira eta lanek eragina duten inguru guztian berrantolatu egin dute. "Teknikariek egindako ikerketaren arabera, zirkulazioaren berrantolatze honek ondo eta zuzen dabil, holako egoera batean ohikoak diren gorabeherak izan badira ere”, zehaztu du Loroñok.
Mikropilotaje lanei dagokienez, inguruan eraiki beharreko piloteen %30 finkatu da eta dagoeneko zenbait ur eta argindar instalazio egin dira. Komunikazio arduradunak aipatu du, azkenik, hainbat "informazio kanal" (eskutitzak, oharrak, prentsa oharrak, telefono berezia, e-posta, harreman pertsonalak…) egokitu direla ere, horien bitartez, "bertako auzokideei lanen gaineko eta horiek izango duten eraginari buruzko informazio argia eta zehatza emateko". Horrekin batera, hesiaren kanpo aldean, auzoko saltokiak iragartzen dituzten kartelak ipini dira, bezeroak, jarri dituzten ibiltoki alternatiboetara bideratzeko.
Gaur hasi dira Getxo Antzoki berria altxatuko duten esparruko hondeaketa lanak, Algortan. Horiek eraikinaren orubean hasi eta, geroago, San Nikolas plaza aldean egingo dituzte. Josu Loroño Komunikazio zinegotziaren ustez, "13 hilabetez" egongo dira zulatzen. Bere hitzetan, "lanek aurrera egin ahala aurkituko dituzten osagai naturalen ezaugarriek eta hauek eragindako trabek zein eguraldiak baldintzatuko dute hori". Lanak astelehenetik ostiralera egingo dira, 8:00etatik 13:00tara eta 14:00etatik 19:00tara. Hondeaketak eragingo dituen arazo edo traba nagusiak dira, batez ere, kamioien zarata, garbiketa eta joan-etorriak. Hartara, traba horiek "ahal den neurrian gutxitzeko hainbat neurri" hartu dira. “Obretan erabiliko diren kamioiak garbitzeko hartxinga pista egokitu dute sarrera-irteera gunean (Etxeandia Artzapezpikua eta Artibai arteko kantoian). Horren eraginez, hauts eta basa gutxiago egongo da. Horretaz gain, kamioiak tutu malguekin garbituko dira obra-eremutik irten aurretik. Mikropilotaje lanak behin amaituta, urez betetako 'piszina' jarriko dute ibilgailuak sartu eta irteten diren lekuan, haiek hobeto garbitzeko. Era berean, zisterna-kamioi batek garbiketa lanak egingo ditu aldian aldian”, zehaztu du Loroñok. Argazkian, Getxo Antzokia bota izanak utzitako orubea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun