Lehiaketaren antolatzaileak, Kinema, Imval eta Claro de Luna Bilboko zinema eskolak, Euskal Herriko Unibertsitateko (EHU) Arte Ederren Fakultatea eta Gizarte eta Komunikazio Zientzien Fakultatea, Erandioko Tartanga Lanbide Heziketa institutua eta Zinebi dira. Aurtengo gaia "Bilbo eta Itsasadarra" izango da. Film laburra adierazitako gaian oinarritu beharko da, nahiz eta zeharka izan. Generoa askea da, eta filmak hiru eta hamar minutu artekoak izango dira, kreditu tituluak barne. Kanpoaldeko lekuen %100 Bilbon filmatua izan beharko du. Izen-ematearekin batera parte-hartzaile bakoitzari HDV/DV zinta bat emango zaie. Zinta eman eta gero, parte-hartzaileek 48 ordu eta euren talentua izango dituzte beren proiektuak burutzeko. Proiektuak azaroaren 16ko arratsaldeko 18:00ak eta 20:00ak bitartean eman beharko dira Zabalgune Eraikinean, DVD eta Window Media CD formatuetan.
Gala eta sari-ematea
Film laburrek aurre hautaketaren lehenengo fase bat pasako dute. Fase honetan, erabakia hartuko duen batzordea aipatutako zinema-eskoletako kideek osatuko dute. Ondoren, epaimahai batek baloratuko ditu hautatutako laburrak eta irabazleak aukeratuko ditu. Epaimahai hau Gabriel Villotak, Arantza Ibarrak eta Shanti Basaurik osatuko dute.
Gabriel Villota EHUko Ikusentzunezko Komunikazioa eta Publizitatea Saileko irakaslea da eta artista moduan lanak egiten ditu. Horrez gain, ikus-artearekin zerikusia duten jarduerak antolatzen ditu. Aldizkari espezializatuetan, arte katalogoetan eta beste komunikabide idatzietan argitaratu du. Arantza Ibarra idazlea, gidoigilea eta zine zuzendaria da, eta "Zigortzaileak" filma zuzentzen ari da gaur egun, Alfonso Arandiarekin batera. Euskaraz filmatuta eta 'bullying' arazoari buruzkoa, "Zigortzaileak" pelikulan Anne Igartiburuk, Carlos Soberak eta Xabier Elorriagak hartuko dute parte, besteak beste. Shanti Basauri konpositore eta musikaria da, "Agur Marijaia" abestiaren autorea. Abestia 2009ko Aste Nagusiko amaiera ospatzeko estreinatu zen.
Azaroaren 20an arratsaldeko 20:00etan ospatuko den festan emango dira hautatutako lanak Zabalgune eraikinean, eta bertan jakinaraziko dira bi sarituen izenak. Sariak hurrengoak izango dira: 600 euroko lehenengo sari bat eta 300 euroko bigarren sari bat. Joan den urtean bezala, film laburrak "El Correo Español" egunkariaren web-orrian izango dira ikusgai: http://servicios.elcorreodigital.com/zinebi-express. Lehiaketaren oinarriak kontsulta daitezke hurrengo web orrian: www.zinebiexpress.es.
Iazko edizioan 53 zinemazale taldek eman zuten izena I. Zinebiexpress lehiaketan parte hartzeko, eta aurten antolatzaileek asteburuan zehar Bilboko kaleak filmazio taldez betetzea espero dute berriro. Pasa den edizioan talde gehienak bilbotarrak ziren, 23 hain zuzen ere. Gainera, Barakaldoko bi talde, Getxoko beste bi, Donostiako bi, Gasteizko bi, Sopelako bat, Barrikako bat, Portugaleteko bat, Galdakaoko bat, Bergarako bat eta Aguraingo beste bat ere aritu ziren.
EHUko Gizarte eta Komunikazio Zientzien Fakultateko, Erandioko Tartanga Lanbide Heziketa institutuko eta IMVAL zine eskolako ikasleen film laburrak egon dira ikusgai, gaur, Bilboko Zabalgune eraikineko atarian. Bihar, berriz, EHUko Arte Ederren Fakultateko eta Claro de Luna eta Kinema zinema eskoletako errealizadore gazteen lanak proiektatuko dituzte bertan. Pre-Zinebiren baitan antolaturiko ekimenen artean, orotara 29 film labur ikusteko aukera izango da, 20:00etatik aurrera, sarrera doakoa dela. Lehenik, Arte Ederretako neska-mutilen bideosormen, bideofikzio eta bideoanimaziozko lanak proiektatuko dira. EHUko ikasleen proiekzioak 58 minutuko iraupena izango du. Ondoren helduko dira Kinema zinema eskolako ikasleen lau film laburrak. Aipatu saioak 31 minutuko iraupena izango du. Azkenik, Claro de Luna zinema eskolako ikasleek euren lanak aurkezteko tartea izango dute. Orotara hiru film labur aurkeztuko dituzte eta saioak 38 minutuko iraupena izango du. Proiekzio osoak 127 minutu iraungo du. Bitartean, asteburu honetan, Zinebiexpress film laburren lehiaketak bere bigarren edizioa beteko du, mundu osoko zuzendariei, talde teknikoari eta talde artistikoei irekita. Izen-ematea larunbatean izango da, 9:00etatik 11:00etara, Zabalgune eraikinean. Eskaerak ez dira mugatuak izango, antolatzaileek jakinarazi dutenez. Argazkian, ikasleak Tartangako errealizazio gelan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun