Pol Asensio algortarraren etxekoen ahotik jakin du Uribe Kostako Amnistiaren Aldeko Mugimenduak, Villenako espetxean (Alacant, Herrialde Katalanak) dauden euskal preso politikoek itxialdiari ekin diotela, "joan zen larunbatean bisitara joandako senitartekoak arakatzen hasi eta bisitarik gabe gelditu zirela salatzeko". Asensioz gain, Arkaitz Goikoetxea getxoztarra ere badago bertan, herritik 758 kilometrotara. Gogoratu behar da Galizia aldeko Curtis-Teixero espetxean dauden presoak itxialdia egingo dutela gaur arte. Bada, azken asteburuetan kartzela askotan gertatzen ari den bezala, pasadan asteburuan, Irantzu Gallastegi berangoztarra bisitatzera joandako senideek, bisita barik gelditu ziren "arakatzeari uko egin ziotelako". "Aipatzekoa da Irantzuren bisita guztiak bisa gelan egiten direla, Arane alaba berarekin irteten delako eta astebururo egoera horrekin aurkituko direla", ohartarazi du Uribe Kostako AMMk. Bitartean, Marije Fullaondo algortarra, Asturias aldeko Villabonako espetxetik atera eta Soto del Realera (Madril, Espainia) eraman dute, handik Castellora eramateko. "Daukagun informazioaren arabera, datorren astean eraman dezakete Sototik Castellora", azaldu errepresioaren kontrako erakundeak. Argazkian, euskal presoak Euskal Herriratzeko aldarrikapena Algortan.
Egun hauetan Nazio Batuetako Torturaren Aurkako Komitea Espainian egiten diren torturak aztertzen ari da Genevan, Uribe Kostako Amnistiaren Aldeko Mugimenduak Etengabe bitakoraren bitartez zabaldu duenez. Giza Eskubideen Euskal Herriko Behatokiko ordezkariek ere parte hartu dute bertan eta, besteren artean, tortura salaketak ez ikertzeak dituen ondorioetan sakontzeko, lehen aipatu Irantzu Gallastegiren neba Orkatzen kasua izan zuen aipagai Iratxe Urizar Behatokiako ordezkariak. Horrek gogoratu zuen Espainiako Auzitegi Gorenak ontzat hartu zuela torturapean hartutako adierazpenak froga nahikoa izateko zigorrezko epai bat oinarritzeko. Hala, Behatokiko abokatuak gaineratu zuen “honek koherentzia ematen dio tortura tresna eraginkorra bezala erabiltzen duen sistema honi, terrorismo kasuetan ikerketa eta auzi-bidea tresna horren bitartez aurrera eramateko”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun