Larunbat honetan, azaroak 14, Jose Maria Atxa Larrearen omenezko bustoa inauguratuko dute Itzubaltzeta / Romoko Gobela futbol zelaian. Arenas Clubeko presidenteordea izan zen Atxa eta lan "garrantzitsua" egin zuen 1928an, Espainiako Ligaren sorkuntzan, tokiko iturriek zehaztu dutenez. Hori dela eta, gainerako taldeek brontzezko bustoa oparitu zioten, bere lana aintzatesteko. Hori, Gobelako antzinako zelaian jarri zen, eta bertan izan zen eraitsi zuten arte. Gaur egun, klubaren bulegoetan gordeta dago, "futbol zelaia berrian jartzerik ez dagoelako". Orain, busto berri horrek ordezkatuko du zaharra. Bustoaren inaugurazioa Arenasen mendeurrena ospatzeko prestatutako ekitaldietako bat da. Futbol talde getxoztarrak eta Santurtzik, 17:00etatik aurrera, 3. Mailako Liga txapelketaren harira jokatuko duten partidua hasi aurretik egingo da. Argazkian, Jose Maria Atxaren busto zaharra / © Arenas Club.
Biharko ekitaldira bertara bilduko da Imanol Landa alkatea, beste udal agintari batzuekin batera. Horiek laguntzeko izango dira ere futbol talde historikoaren egungo arduradunak, presidente ohiak eta jokalari esanguratsu zenbait, Gobelara hurbilduko diren zaletuekin batera. Dantzari batek ohorezko aurreskua dantzatuko du Atxaren busto aurrean, -tribuna nagusiko alderdi batean (tabernaren ondean)- eta bi taldeetako kapitainek lore sorta utziko dute bustoaren oinetan, Arenasen ereserkiaren doinuak entzuten diren bitartean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun