Itsasoan, bihar goizaldean hego/hego-mendebaldeko haizeak, 5eko indarrarekin eta 6-7ko tarteekin, itsaskia edo itsaski handia eragingo du. Gainontzeko orduetan baretu egingo da eta 3-4ko indarra hartuko du: lehenengo bi milietan itsaso kizkurra eragingo du, gainontzeko lekuetan itsaskirria edo itsaskia. Mendebal/ipar-mendebaldeko hondoko itsasoak hiru metroko olatuak altxatuko ditu, eta egunean zehar handitu eta 3,5 metro ingurukoak izango dira. Uraren tenperatura 15-16 gradukoa da eta ikus-eremua hamar kilometrotik gorakoa izango da. Itsasgorak 1:16an eta 13:39an izango dira, eta itsasbeherak, 7:14an eta 19:43an.
Igandean, hego-osagaiko haizea ibiliko da, 4-5eko indarrarekin, eta itsaskirria izango da, itsaskiko guneekin. Mendebal/ipar-mendebaldeko hondoko itsasoak 2,5-3 metroko olatuak altxatuko ditu. Uraren tenperatura 15-16 gradukoa da eta ikus-eremua hamar kilometrotik gorakoa izango da. Itsasgorak 1:59an eta 14:22an izango dira, eta itsasbeherak, 7:59an eta 20:24an.
Euskalmet Meteorologiaren Euskal Agentziaren iragarpenaren arabera, bihar goizaldean haizeak indarra galdu egingo du eta goizetik aurrera askoz ahulago ibiliko da. Dena dela, eragin handia izango du oraindik eguraldian eta tenperatura epela izango da beste behingoz, maximoak 3-4 gradu jaitsiko diren arren. Zerua oso hodeitsu egongo da, baina euria urria izango da; goizean goiz egingo du gehiengoa, fronte hotza pasatutakoan. Igandean, eguraldi nahasi eta aldakorrarekin jarraituko dugu. Hegoaldeko haizea indartu egingo da berriro eta kostaldean eta mendi inguruetan gogor joko du. Haizearen eraginez, igandeko tenperatura maximoak larunbatekoak baino zertxobait altuagoak izango dira. Euria egiteko probabilitatea ez da oso handia izango, baina tantaren bat bota dezake. Erdi mailako hodei eta goi-hodeiak izango dira nagusi, batzuetan zerua lainotuta egongo da eta beste batzuetan urdin guneetatik eguzkia ikusiko dugu. Argazkian, urtarrileko zikloiak, besteak beste, hainbat ontzi hondoratu zituen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun