Baina, udal mailan, Getxoko PPren jazarpena jasateaz gain, gaztea espetxetik irten eta bi egunetara, Zigor eta Arkaitz Goikoetxearen aita-amen Azkorriko (Getxo) baserriak izan zuen erasoa. "Zigor hiltzaile", "Hilda zaude", "Gora Espainia terrorista" eta "Hil zaitezte" leloak espainolez pintatu eta atariko oin-zatarra eta sasi batzuk gasolinaz erre zituzten. Bitartean, Uribe Kostako Amnistiaren Aldeko Mugimenduak hedabideen jarrera salatu du, oraingo honetan, ABC egunkariak orrialde osoko artikulua (espainolez) argitaratu izana kontuan hartuta. "Amnistiaren Aldeko Mugimenduak askotan salatu du hainbat hedabideen jarrera. Kasu honetan preso ohien aurkako jazarpenaren barruan sartu beharko genuke artikulu hau. Gogoratu behar dugu Espainiako gobernuak Kode Penalaren azken erreforman erabaki duela preso ohiei espetxetik irten eta hamar urtetan epaitegiaren kontrolpean jarraitzeko (espainolez)", salatu du errepresioaren kontrako erakundeak.
Bitartean, 2009ko irailean eman zuen Baltasar Garzon Espainiako Auzitegi Nazionaleko epaileak Zigor bera eta Algorta, Getxo eta Berangoko beste hamar gazte prozesatzeko autoa, 2007ko urrian egindako polizia operazioaren harira. Orduan ere atxilotu zuten Azkorriko laguna eta fidantzapean askatu, osasun arazoak zirela eta. Beste guztiak ere kalean dira gaur egun. Auzipetutako guztiei kale borroka taldea osatu eta 2004tik 2007ko uztailera bitarteko hamar ekintza inguru leporatzen diete. Bitartean, Uribe Kostako Amnistiaren Aldeko Mugimenduak "eskandalugarritzat" jo du behin eta berriro Garzonek orduan kaleratutako autoa.
Ikusi PPk zabaldutako bideoa, Antonio Basagoitiren adierazpenekin:
Zigor Goikoetxea gazte getxoztarrari medikuarengana Lapurdira joateko baimena eman izana "berriz hausnartzea" eskatu dio Espainiako Auzitegi Nazionalari Antonio Basagoiti Araba, Bizkaia eta Gipuzkoako PPko presidenteak. Buruzagi popularraren arabera, "ez da normala podologoarengana Frantziara joaten uztea terrorismoagatik zigortutako bati, Bilbon podologo nahikoa dagoelako eta, agian, ihes egingo duelako". Azkorriko mutilari bi urteko espetxe zigorra, Marisa Arrue Getxoko PPren zinegotziari 6.000 euroko isuna ordaintzea eta berarengandik 300 metro baino urrunago egotera zein Getxotik at bizitzea ezarri zion Auzitegi Nazionalak. Era horretan, epaileek ontzat eman zuten Arruek gaztearen aurka balizko heriotza mehatxuengatik jarritako salaketa. Epaiketa apirilaren 14an egin zen eta bertan lekuko guztiek ukatu zuten Goikoetxeak mehatxuak egin izana. 6.000 euroko bermea ordainduta, uztailaren 15ean askatu zuten. Handik gutxira, uztailaren 29an, PSE-EEko zinegotziek ontzat jo zuten Getxoko PPk aurkeztutako mozioa, Zigor Goikoetxea "persona non grata” izendatuz. Argazkian, Zigor Goikoetxea lehenengo harreran.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun