Hamabi urterekin jo zuen lehenengoz plazan Mauriziak. Geroztik, plazarik plaza ibiliko zen soinujole zein alboka-joleekin. Kultur munduan emakume aitzindaria izan zen eta oso ezagun bilakatu zen bera, baita koplak kantatzean egiten zituen amaierak eta bere burua animatzeko botatzen zituen aupadak ere.
60ko hamarkadan hartu zuen osperik handiena. Benantzio Bernaola “Karakol” senarra ere soinujolea zuen. Hau makaldu zenean, Fasio (trikitia) eta Leon Bilbaorekin (alboka) hirukoa osatu zuten. Orduko musika tendentzia berriak jorratzen zituzten gazteak ere txundituta utzi zituen Mauriziak.
Ikerkuntza proiektu hau aurrera eraman ahal izateko ezinbestekoa izan da Mauriziaren senideen, lagunen eta euskal kulturaren inguruko adituen laguntza. Horien bitartez informazio ugari batu eta dokumentazio lan handia egin da. Hasierako lan honen eta gero liburua idaztearen ardura Xabier eta Fredi Paya bertsolari ezagunek hartu zuten.
Liburua bi zatitan banatu dute payatarrek. Batetik, Mauriziaren biografia pertsonala bildu dute, eta bestetik, biografia musikala. Horrela, emakume kementsu horren bizitza pertsonala eta erromeriarako jarrera eta bertan zuen papera uztarturik azaltzen dira.
Lan honen helburua "Bizkaiko panderojole mitikoaren bizitza eta biziera dokumentatu eta argitaratzea izan da", Bizkaiko Trikitixa Elkarteak zabaldu duenez. "Horrela trikitixaren esparruko informazio ugari mantentzea ahalbidetuko dugu, gaurko eta etorkizuneko trikitilari eta panderojoleek guzti honen berri izan dezaten".
“Aupa, Maurizia!” burutzeko Zeberioko Udala eta Bizkaiko Foru Aldundiaren euskara sailaren laguntza izan du Bizkaiko Trikitixa Elkarteak.
Pasa den irailean Fredi Payak eta Ekaitz Larrazabal "Katxo"k Euskal Herriko Trikitixa Elkarteak antolaturiko "Trikitixa eta emakumea" jardunaldien barruan "Aupa, Maurizia!" liburuaren aurrerapen musikatua eman bazuten ere, ostegun honetan anai payatarrek liburuaren aurkezpen ofiziala egingo dute. Bilboko foru liburutegian izango da hori, goizeko 12:30ean. Bizkaiko Trikitixa Elkarteak argitaratutako liburuan, jakina, Maurizia Aldaiturriaga panderojolearen biografia bildu dute idazleek, hots, Fredik eta Xabik. Maurizia Zeberion jaio zen 1904. urteko irailaren 22an. Txikitatik hasi zen panderoa jotzen; berak bakarrik ikasi zuen etxean. "Berak berez ikasi zuela esaten zuen. Baina une oroko ekin autodidakta zen berea. Orduak ematen zituen bere logelan sartuta panderoa jotzen eta koplak sortzen nahiz kantatzen. Eta erromeriara edo emanaldi batera joan aurretik nahiz gero ere ekinean jarraitzen zuen. Harentzat ez zegoen atsedenik, ez zen gaur egungo musikari funtzionarizatu ugari bezala" zioen Aldaiturriagaz Fredi Payak pasa den irailean. Argazkian, Maurizia, Fasio eta Leon musikarien artean / © Andra Mari Eusko dantzari Taldea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun