40 filma
"Zinema Bultzatuz" programan emango diren filmak "askotarikoak dira, bai gaiaren aldetik bai publiko jasotzailearen aldetik ere, nahiz eta, bistan da, lehentasunezko ikuslegoa haurrak eta familiak izango diren", Kultura Sailetik zabaldu dutenez.
Ikusiko diren filmak, oro har, zine formatukoak dira, eta gutxi izango dira estreinatuko direnak, nahiz eta gehiengoa azken urteotan errodatutakoa izan. Eskaera handiena dutenak, baina, berriki zinema-aretoetan ikusi ahal izan direnak ditugu: "Zorion perfektua" eta "Pluk eta bere garabia", esate baterako. Euskal ekoizpenak izango dira, europarrak, estatubatuarrak, eta baita japoniarrak ere.
Ekimenaren helburua zine-aretoetan euskarara bikoiztutako filma-kopurua areagotzea da. Urteko azken hilabete hauetan, lau izenburu euskaratu eta estreinatu dira Kultura Sailaren programa honen babesean: "Vickie bikingoa", lehen aipaturiko "Pluk eta bere garabia", "Planet 5" eta "Igela eta zapoak". Horiei erantsi behar zaizkie aurretik plazaratutako "Animal channel", "Cher ami", "Txori urdin", "Niko eta izarretako bidea" eta "Ponyo". Azken hori Anoetako Belodromoan aurkeztu zen, Donostiako Zinemaldiaren programazioaren barruan. Horietaz gain, "Chekpoint Rock" dokumentala ikusi ahal izango da, baita aurreko urteetako haur, gazte eta helduentzako beste 27 filma gehiago ere. Jakina, guztiak ez dira Leioan emango, baina baliteke Bilboko Renoir eta Multi zinemetan, edo Basauriko Bilbondo zein Sozial Antzokian gustuko zer edo zer izatea.
"Zinema Bultzatuz" eta "Euskara Zine Aretoetara" programen barruan, zenbait film euskaldunak ikusteko parada izango da datozen hilabeteetan Leioako Kultur Leioan eta Algortako Fadura polikiroldegian. "Zinema Bultzatuz" ekimen berria Eusko Jaurlaritzako Kultura Sailak, Euskadiko Filmotekak, sei zine aretok eta 19 udalek, tartean Leioa, jarri dute martxan. Proiektuan 100.000 euro inbertitu dira euskaraz ekoitzitako edo euskarara bikoiztutako filmak Gabonetako garaian zabaltzeko. Horri esker, berrogei filma ikusi ahal izango dira abenduaren 2tik urtarrilaren 6ra, data eta filma zehatzak udalek eta aretoek finkatu beharko dutela. "Euskara Zine Aretoetara" programari dagokionez, 1997an sortu zen Tinko euskara elkarteak eta Eusko Jaurlaritzako Hezkuntza Sailak sinatutako akordioari esker. Haur eta gazteen artean zinema euskaraz ikusteko ohitura sustatzeko asmoz, urtero berretsi dute hitzarmena eta baita hainbat udal batu ere, Getxo bezala. Ikasturte honetan, inguruko ikastetxeek emanaldi bat izan dute eta beste lau izango dituzte aurrerantzean, gertuena abenduaren 18an izango dela. Argazkian, "Sukalde Kontuak" filma aretoetara eramango dute berriro / © Cecilia Posada.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun