"Beltzak" Azpeitian
Hego Euskal Herri mailan ehunaka ikaslek parte hartu du protestetan ia arazorik gabe. Gertaera bakarra Azpeitiko Ikasberri zentroko ikasleek pairatu dute, elkarretaratzea egin eta bukatu dutenean, Ertzaintzaren bi auto eta Brigada Higikorra (Beltzak) agertu eta Ikasberriko ikasle bat identifikatu dutenean, antza elkarretaratzea ez komunikatzeagatik.
Eskola gehienetan, IAk jakinarazi duenez, "kurtso hasieratik egiten jardun duten diagnostikoaren inguruan eztabaidatzeko asanbladak egin dira, eta horrekin batera marra gorriak markatu dituzte ikasleek norberak bere diagnostikoaren ondorioen arabera. Modu desberdinak erabili dituzte horretarako; batzuetan eskolako hormak papelez bete dituzte, ondorioak zehaztuz, beste batzuetan marra gorriak margotu dituzte zuzendaritzetan, edo irakasleen ateetan, edo antzerakoetan. Horretaz gain, elkarretaratzeak eta manifestazioak ere egin dituzte ikasleek".
Unibertsitateetan antzerako ekimenak burutu dira, baina kasuan kasu, parodiak eta bestelakoak ere egin dira.
Horretaz gain, bai eskola zein fakultateetan eskuorri banaketak egin dira. Gaurko eguna testuinguratuz testu orokor bat erabili da guztietan, eta horrekin batera, eskola eta fakultate bakoitzak bere testua ere kaleratu du eskuorrietan, diagnostikoari eta lekuan lekuko marra gorriei erreferentzia eginez.
Gaur, azaroaren 17an, Ikasleen Nazioarteko Egunaren harira mobilizazioak egin dituzte ikasleek Leioa eta Erandioko campusean zein Itzubaltzeta / Romon. Ikasle Abertzaleak erakundeak deitutako protestan, 80 lagun bildu dira campuseko bi sarreretan, IAk emandako datuen arabera. Bertan bide mozketa bana egin dute eguerdian, ordu erdi inguruz, gerora Errektoregoraino manifestazioan abiatu direla. Aurretik, goizeko 9etan, Gizarte eta Komunikazio Zientzietako fakultatean burrunbada egin, klasez klase pasa eta antzerki-tertulia antolatu dute. Gainera, zentroa kartulinaz bete dute. Horien bidez, Euskal Herriko eta munduko Ikasle Mugimenduaren historia azaldu dute. Tartean, gaurko egunaren jatorria azaldu dute. Izan ere, Pragan orain dela 70 urte, naziek Jan Opletal ikaslea erail eta ondoren izandako ikasleen matxinada birrindu eta bertako unibertsitatea itxi egin zuten okupatzaile alemanek. Arte Ederretan ere, ekintza ikusgarria egin dute, goizean fakultatean zehar pintura gorriz betetako ur pistolak zintzilikatu dituztela. Azkenik, Itzubaltzetako Romo-Artatza institutuko 10 ikaslek elkarretaratzea eta asanblada egin dituzte. Argazkian, Leioa eta Erandioko campusean egindako manifestazioa / © Ikasle Abertzaleak (IA).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun