Getxo Antzoki berria eraikitzeko lanek kaltetutako merkatari eta auzotarrei zergak jaitsi diezaietela eskatu berri du Getxoko PPk. Horretarako, mozioa aurkeztu dute popularrek, azaroaren 27ko udal batzarrera begira. Urriaren 30eko osoko bilkuran ere tasak eta zergak izan zituzten hizpide. Orduan, Marisa Arrue buru duen alderdiak ez zuen ontzat jo, 2010erako udal tasak eta zergak bere horretan utz zitezen, PSE-EEk egindako eskaera. EAJren Udal Gobernuak, ordea, bai; aurretik erabakita zegoen arren. Oraingo honetan, Getxo Antzoki ingurukoek zarama bilketa tasa ordaindu behar ez izatea eskatu du Getxoko PPk; baina "obrak iraun bitartean" bakarrik. Horretaz gain, Ondasun Higiezinen gaineko Zergaren erdia ordain dezaten nahi dute; auzokoek TAO ordaindu behar ez izateaz gain. Bitartean, kaltetuen elkartea osatzea ez dute baztertzen inguru horretako lagunek; batzarren bat ere egin dute jada. "Informazio faltaz eta antzoki berriaren tamainaz" kexu dira merkatari eta bizilagunak. Joan den astean, berriz, lanek eragingo dituzten eragozpenak "ahal den neurrian gutxitzeko" hartutako neurrien berri eman zuen Getxoko Udalak. Argazkian, Getxo Antzoki inguruan jarritako hezia.
Eduardo Andrade Getxoko PPren bozeramaileak atzo adierazitakoaren arabera, "bederatzi dira ateak itxi behar izan dituzten lokalak". Orotara, 22 saltoki eta 6 taberna ei daude, Algortako inguru horretan. "Bataz beste, dendek 398 euro ordaindu behar izaten dituzte urtero, zarama bilketagatik; eta tabernek 526 euro. Orotara, 12.000 euro gutxiago jasoko lituzte Udalak. Guztiz onargarria, beraz", azaldu zuen Andradek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun