Egun 350 langile baino gehiago dituen Vidrieria y Cristaleria de Lamiako S.A. (Vicrila) enpresak 2013 bukaeran itxiko ditu ateak, ELA eta LAB sindikatuetako Vicrilako ordezkaritzek Interneten zabaldu dutenez. Atzo bertan, Leioaraino hurbildu zen Oliver B. Hasler Arc International multinazionalaren Europako zuzendaria, erabakiaren berri emateko, lantokiko arduradunei zein enpresa batzordeari. Gauzak horrela, beira lantzeko bi labeen balio-bizitza agortu artean -kasu batean hemendik 14 hilabetera eta bestean 2013 bukaeran- diru gehiagorik ez du inbertituko, Lamiakon, enpresa frantziarrak. Haslerren arabera, "merkatuaren beharrei egokitzeko" hartu dute Vicrila ixteko erabaki "mingarria". "Fabrikazio koste txikiagoak dituzten herrialdeetatik datozen produktuen aurrean lehiakortasuna mantentzeko, produkzio gaitasuna egokitu beharko dugu. Gainera, 2008ko bigarren seihilekotik hona areagotu egin da salmenten jaitsiera, krisi mundialaren ondorioz", azaldu du Arc International-eko arduradunak. Multinazional frantziarraren arazoak tarteko ezarri zieten enplegua erregulatzeko dosierra Vicrilako langileei, maiatzaren 1ean. Abenduaren 31ra arte luzatuko da hori. Argazkian, Vicrilako langileek aspaldi egindako manifestazioa / © LAB Vicrila.
Langileenganako kaltea "ahalik eta txikiena" izan dadin, itxi aurretik, Vicrilaren aktibitatea "pixkanaka" gutxitzera konprometitu da Arc International, "beharginei lan berria bila dezaten laguntzeko".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun