Zinebiexpress Film laburren Lehiaketako bigarren ekitaldiko epaimahaiak saria irabazteko hautagaiak diren 17 film laburrak aukeratu ditu jada. Horiek, ostiral honetan, azaroak 20, ikusi ahal izango dira Zabalguneko atarian, 20:00etatik aurrera, Zinebiexpress festaren baitan. Proiekzioaren ondoren irabazleen izenak ezagutaraziko dira. Sariak erabakitzeko ardura duen epaimahaia ondorengo lagunek osatzen dute: Gabriel Villota EHUko irakasleak, Arantza Ibarra idazle, gidoilari eta zuzendariak; eta Shanti Basauri konpositore eta musikariak. Orotara 54 taldek parte hartu dute Zinebiexpressen, iaz baino 11 talde gehiago. Talde gehienak bilbotarrak dira, 29 guztira, 4 getxoztarrak eta bi mungiarrak. Talde bana etorri da Donostiatik, Andoaindik, Hernanitik, Zumaiatik, Portugaletetik, Gernikatik, Larrabetzutik, Iruñeatik, Andosillatik eta Valentziatik; baita Sopela, Leioa eta Erandiotik ere. Aukeraturiko film laburrak Zinebiren prentsa-webgunean daude ikusgai. Lehiaketaren antolatzaileak, Kinema, Imval eta Claro de Luna Bilboko zinema eskolak, Euskal Herriko Unibertsitateko (EHU) Arte Ederren Fakultatea eta Gizarte eta Komunikazio Zientzien Fakultatea, Erandioko Tartanga Lanbide Heziketa Institutua eta Zinebi dira. Argazkian, ikasleak Tartangako errealizazio gelan / © Tartanga LHI.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun