Algortako Bilgune Feministaren oharra:
Erasoei ofentsiba, ekin autodefentsari!
Emakumeon kontrako indarkeria kasuak kaleratzeaz nekatuta gaude, egoeraren larritasunaz eta arazoaren izaera estrukturala eta instituzioen hutsuneak ikustarazteaz ere bai. Emakume izatearen arriskuez kontziente gara, baina ez dugu salbatzaileen zain egoteko asmorik. Gure burua defendatzeko gaitasunean sinesten dugu eta kolpeei, irainei, gutxiespenei, mehatxuei aurre egin nahi diegu. Egin nahi ez duguna egiteari utziz, maite gaituela dioten erasotzaileei planto eginez, menekotasunetik kanpo gure bizi proiektuak askatasunean garatuz. OFENTSIBARA PASAKO GARA: erantzutera, defendatzera eta ekitera!
Indarkeriaren erroetara jo eta berarekin amaitzeko beharrezko diren jokabide, jarrera eta tresnak eskuratuko ditugu; hots, autodefentsa praktikatuko dugu.
Emakume bat erasotzen dutenean, gutako edonor erasotuko balute bezala da. Eraso sexistak ezin ditugu kasu isolatu gisa tratatu, eraso bakoitzak emakumeon egoera orokorrarengan eragiten baitu. Hortaz gure artean bildu, hitz egin, eztabaidatu eta antolatu beharra dugu.
Instituzioen itxurakeriaz eta martxan dituzten neurri urriez nekatu gara eta horren kontra errebelatzen gara. Emakume gazteengan oraindik orain dauden indarkeri egoera larriak eta gazteen artean ematen diren harreman ez parekideen errealitateak jendartearen estruktura patriarkalak bizi-bizirik daudela adierazten digu, eta guk hau irauli nahi dugu. Horretarako beharrezko diren prebentzio neurriak lantzea ezinbestekoa da, batez ere hezkuntza sisteman.
Kalera atera eta indarkeri egoerari aurre egin nahi diegu ozen. Indarkeriari aurrea hartu nahi diogu!
Azaroak 25, asteazkena, 20:00etan, Telletxen.
Datorren asteazkenerako, azaroak 25, "Erasoei ofentsiba, ekin autodefentsari!" lelopeko mobilizazioak antolatu dituzte Algortako Bilgune Feministak, Algortako Emakume Gazteon Asanbladak eta Leioako Emakume Gazteon Asanbladak. Izan ere, Emakumeenganako Indarkeriaren Aurkako Nazioarteko Egunari begira egindako hausnarketan azaldu bezala, "Emakumeon kontrako indarkeria kasuak kaleratzeaz nekatuta gaude, egoeraren larritasunaz eta arazoaren izaera estrukturala eta instituzioen hutsuneak ikustarazteaz ere bai". Horregatik, "Euskal Herri feminista" helburu, "ofentsibara" igarotzeko deliberoa hartu dute. Protestak honako ordu eta lekuetan burutuko dira: Leioako Boulevard-ean 19:00ean eta Algortako Telletxe plazan, 20:00etan. Argazkian, iaz Algortan egindako elkarretaratzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun