Ekintzarik ez
Ekintzarik burutu ez zuen Lanbroa komandoko kideak izatea leporatu zieten lauei, Iñaki Gonzalo Casali 30 urteko zigorra ezarriz. Handik aurrera, itzubaltzetarrak Carabanchel, Navalcarnero, El Dueso, Basauri, Valdemoro, Ocaña I, Langraiz eta azkenean Dueñasko La Moraleja espetxeak ezagutu ditu. Azken hamaika urteotan bertan izan da, Itzubaltzeta / Romotik 271 kilometrotara.
"Kitxu"ren egoeraren salaketak
Palentziako Dueñas espetxean dituzten euskal preso politikoek eta, bereziki, Gonzalo bere herrikideak bizi duen egoera salatu du hainbatetan Itzubaltzeta / Romoko Amnistiaren Aldeko Mugimenduak. Errepresioaren kontrako erakundeak pasa den martxoan salatu zuenez, "bisitari kopurua hamar lagunera murriztu zuten 2008ko ekainean. Gainera, zerrenda hori abenduan amaitu zen eta oraindik ez dute berria onartu". Hori dela eta, bisitak ez ezik, aurrez aurrekoak ere galdu zituzten presoek. Gonzalo Casal itzubaltzetarrari lagunak ikusteko "eskubidea" ere kendu egin zioten. Etxekoei dagokienez, presoen senide direla frogatzen zuten agiriak aurkeztu behar izan zituzten berriro, "nahiz eta paper horiek espetxe agintarien eskuetan egon jada", AAMren hitzetan. "Horrek familiarrengan eragozpenak sortzea baino ez du helburu", orduan salatu zutenez.
Datorren ostiralean, hilaren 27an, Iñaki Gonzalo Casal "Kitxu"-k kartzelan eta sakabanatuta 15 urte pasa dituela salatzeko, manifestazioa egingo dute Itzubaltzeta / Romon. Bertako Amnistiaren Aldeko Mugimenduak zabaldu duenez, "'Kitxu' 15 urte kartzelan. Etxean nahi dugu!" lelopeko martxa azken ostiraleko ohiko elkarretaratzearen orduan abiatuko da, 20:00etan, Xake plazatik. Gonzalok 45 urte ditu eta bere bizitzaren herena eman du espetxean. Izan ere, pasa den urriaren 25ean Ertzaintzak atxilotu zueneko 15. urtemuga bete zen. Orduan, Areetako Bizkaiko Zubiko plazan harrapatu zuten, Urdulizko Andoni Muñoz, Algortako Iñigo Otazua Urresti "Oti" eta Angel Figueroa Fernandezekin batera. Gauzak horrela, pasa den hilabetean gogoratu zuten Urdulizen Muñozen egoera. Argazkian, pasa den ekainean, bere urtebetetze egunean elkartasuna adierazi zioten Gonzalo Casali hainbat herrikidek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun