LAB sindikatuak zabaldutako informazio orria:
Cespak eta Udalak gure minusbaliotasunagatik baztertzen gaituzte
Auzokideok:
Sopelako kaleak garbitzen ditugun 13 langileak, Cespa eta Udalaren aldetik pairatzen dugun bazterketa bidegabe eta iraingarriaren berri eman nahi dizuegu.
Hiru urte daramatzagu Cesparentzat lan egiten, eta gaur-gaurkoz beste Udalerrietan lan egiten duten langileen erdia kobratzen dugu. Soldata lotsagarriak, urteko 365 egunetan, jaietan, Gabonetan, herriko jaietan… lan egitearen truke. Kaleak, hondartzak, estolda zuloak… garbitzearen truke.
Zerbitzu batean, enpresa aldaketa ematen denean eta langileak subrogatzen direnean, hauek baldintza kaskarragoak izan badituzte ohikoa izaten da parekatze progresiborako akordio baten bidez baldintzak hobetzea, beste langileen mailara iritsi arte. Gure kasuan hau ez da horrela, hiru urtetan ez dugu izan inolako igoerarik. Zergatik ote? Minusbaliotasunak ditugulako?
Bi urte daramatzagu ukaezina den eskubide bat aldarrikatzen: Lan berdinagatik, soldata berdina izatea.. Cesparekin izan gara, eta honek Udalera bidaltzen gaitu, Udalarekin egon gara eta Cesparena dela erantzukizuna esaten digu. Talde politikoekin ere izan gara eta ezer ez. Hitzak besterik ez, hitz onak bai baina inolako ekintzarik ez. Negoziatzen hasteko mahaian esertzeko aukerarik ere ez digute eskaini. Hitz politak besterik ez.
Guk ez ditugu hitz onak nahi, soldata duin eta bidezkoa exijitzen dugu gure lanagatik.
Minusbaliatuak direlako "baztertzea" egotzi diete Cespa eta Sopelako Udalari kale-garbitzaileek
2009ko aza. 21a, 19:53
Sopelako kaleak garbitzen dituzten langileek kontzentrazioa egin zuten atzo, ostirala, udaletxearen aurrean, bizi duten "bazterketa bidegabe eta iraingarria" salatzeko asmoz. Horren erantzule egin dituzte Cespa enpresa eta Udala. Epe laburrean, greba deialdia egin dezaketela adierazi zuten, Sopela.net agerkari digitalak jakinarazi duenez. Zabaldutako informazio orrian, LAB sindikatuak azaldu duenez, 13 kale-garbitzaileek hiru urte daramatzate Cesparentzat lan egiten "eta gaur-gaurkoz beste udalerrietan lan egiten duten langileen erdia kobratzen". "Zerbitzu batean, enpresa aldaketa ematen denean eta langileak subrogatzen direnean, hauek baldintza kaskarragoak izan badituzte ohikoa izaten da parekatze progresiborako akordio baten bidez baldintzak hobetzea, beste langileen mailara iritsi arte. Gure kasuan hau ez da horrela, hiru urtetan ez dugu izan inolako igoerarik", salatu dutenez. Hori minusbaliatuak direlako ote den "galdetu" diete Cespari eta Udalari. Argazkian, Sopelako kale-garbitzaileetako bat / © Sopela.net.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun