Kultur Etxea txarto funtzionatzearen errua kaleratutako langile bati botatzea egotzi dio Urdulizko Udalari ELAk
"Zer gertatzen da Urdulizko Kultur Etxean?" izenburupean, udalerriko kaleak kartelez bete ditu ELA sindikatuak. "Hori da irailetik erabiltzaileek euren buruei egiten dioten galdera, zergatik huts egiten duten bertan antolatzen diren ekimenak, alegia", gaineratu dute. Hain zuzen ere, "gezurretan aritzea" leporatu dio Urdulizko Udalari sindikatu nazionalistak: "erabiltzaileak kexatzen diren bakoitzean, langile bati botatzen diote errua. Udalarena baino ez da funtzionamendu txarraren ardura", azaldu dute. ELAk argitu duenez, duela 20 urtetik hona, Kultur Etxearen ekimenak antolatu eta planifikatu dituen langilea, Oiane Alzibar, uztailaren 30eko alkate dekretu bidez kaleratu zuten, eta abuztuaren 1etik ez dauka horren ardura. "Interes publiko, efikazia eta eraginkortasun arrazoiak argudiatuta bota dute, hori gezurra baino ez denean. Bere lan baldintzak direla eta, Alzibarrek Udalarekin duen auzia da, kaleratua izateko arrazoia", salatu du ELAk. Argazkian, Urdulizko kultur etxeko eraikina.
"Ez dugu onartuko Udalak Urdulizko Kultur Etxearen (UKE) funtzionamendu eskasaren ardura kaleratutako langilearengan jartzea. Urduliztar guztiek jakin badakitenean Oiane Alzibarren lana bikaina eta eredugarria izan dela, bota duten arte", adierazi du ELAk. Hain zuzen ere, Alzibar "arrazoi politikoengatik kaleratzea" leporatu dio tokiko erakundeari sindikatu nazionalistak. Egun, UKEn beste hainbat lan egiten zituen azpikontratak hartu ditu kaleratutako langilearen eginbeharrak, aipatu dutenez. ELAren arabera, "agerikoa da maniobra politiko horiek helburu ez oso argiak dituztela eta gertuko langileak jartzeko baino ez direla, berezko eta horretarako trebatutako beharginak behar direnean". Hori dela eta, "horrelako erabakiak hartzen dituztenei" egotzi diete UKE txarto funtzionatzearen errua.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun