Ume getxoztarrek aste honetan izango dute eskura euskarazko produktuen katalogo berria
Gabonei begira plazaratutako euskarazko produktuen katalogo berriaren 15.000 ale aste honetan hasiko da banatzen Getxoko Udaleko Euskara Zerbitzua. Hain zuzen ere, 0 eta 18 urte bitarteko neska-mutilak dauzkaten familia getxoztarren etxeetara bidaliko dituzte, produktu horiek salgai diren udalerriko 15 komertzioen zerrenda eskaintzen duen Imanol Landa alkatearen eskutitzarekin batera. Liburuxkak euskaraz plazaratzen diren "produktu egokienak" eta haien inguruko informazioa (argitaletxea, prezio tartea eta abar) jasotzen ditu, "etxeko haurrek eta gazteek euskaraz jolasteko, ikasteko, irakurtzeko edo gozatzeko aukera izan dezaten", udal iturriek aipatu dutenez. Katalogoa udalerriko dendetan eta egoitza publikoetan ere eskuragai egongo da; baita www.katalogoa.org webgunean ere. Aurtengo berrikuntza, nolanahi ere, sarekoa da. Izan ere, guztiz berrituta dago, paperean jasotako produktuez gain, merkatuan aurkitu daitezkeen beste asko agertzen baitira. Aukera dago, gainera, produktu horien saltokietara iristeko, eta bertatik erosteko. Argazkian, umeak jolasean Getxoko udako liburutegietako batean / © Getxo.net
Liburuxka horren argitalpenean, Eusko Jaurlaritzak; Araba, Bizkaia eta Gipuzkoako foru aldundiek; eta udal eta mankomunitate ugarik parte hartzen dute, tartean Uribe Kostako Mankomunitatea dagoela. Guztira, 240.000 ale banatuko dira. Honako zortzi atal hauetan dago banatuta: musika, DVD filmak, aldizkariak, komikiak, liburuak, gurasoentzako materiala, informatika eta jostailu eta jokoak. Zenbait ataletan adinaren araberako banaketa ere egiten da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun